ԵՐԵՎԱՆ, 3 հունվարի./Նովոստի-Արմենիա/. ՀՀ պաշտպանության նախկին նախարար Դավիթ Տոնոյանը, ով կալանավորվել է առանձնապես խոշոր չափերի հափշտակություն կատարելու փաստի առթիվ հարուցված քրեական գործի շրջանակում, հայտարարել է, որ գործ ունենք իրեն և պաշտպանական համակարգը վարկաբեկելու մոլեռանդ ցանկության հետ։
Հայկական ԶԼՄ-ներին տված հարցազրույցում Տոնոյանը նշել է, որ պահանջելու է դռնբաց, հրապարակային դատավարություն:
«Նախաքննության ավարտից հետո, եթե մեղադրական եզրակացություն կկազմվի, և այն դատախազության կողմից հաստատվելով՝ գործը կուղարկվի դատարան, պահանջելու եմ դռնբաց, հրապարակային դատավարություն՝ իհարկե, հաշվի առնելով պետական ու ռազմական գաղտնիքի հետ կապված սահմանափակումները», - նշել է նախկին նախարարը:
Տոնոյանը նշել է, որ առիթներ կլինեն հանրությանը ներկայացնելու իր պարզաբանումները 44-օրյա պատերազմի վերաբերյալ՝ ստեղծվելիք քննիչ հանձնաժողովների միջոցով, եթե ապահովվի վերջինիս աշխատանքի օբյեկտիվությունն ու անկողմնակալությունը:
Նա վստահեցնում է, որ անգամ ավարտված ոչ օբյեկտիվ նախաքննությամբ չհաստատվեց հրթիռների անորակ կամ անպիտան լինելը՝ նշանակված դատապայթյունատեխնիկական փորձաքննությունը անկատար թողնելու, հրթիռները չփորձարկելու պատճառով: Պարզ էր, որ փորձաքննությունն իրականացնելու պարագայում հաստատվելու էր հրթիռների կիրառելիությունը:
«Մի բան հստակ է, որ գործ ունենք ինձ և պաշտպանական համակարգը վարկաբեկելու մոլեռանդ ցանկության հետ։ Դրա վառ ապացույցն է այն, որ գործում ունենալով տեղեկություններ, որ «անպիտան» որակված հրթիռները գտնվել են ժամկետի մեջ, անգամ 44-օրյա պատերազմի ընթացքում են կիրառվել և լուծել մարտական խնդիր, այդուհանդերձ վարույթն իրականացնող մարմինը հայտարարություն է տարածել, թե «ՀՀ ՊՆ-ին հատկացված միջոցների հաշվին ձեռք են բերվել տեխնիկական բնութագրին և ՀՀ սպառազինության պահանջմունքներին չհամապատասխանող, շուկայական արժեքից էականորեն թանկ, շահագործման համար պիտանելիության ժամկետները սպառված հրթիռներ, ինչի վկայությունն է նաև այն, որ մատակարարումից որոշ ժամանակ անց հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 2020 թվականի սեպտեմբերի 27-ին սկսված 44-օրյա պատերազմի ժամանակ», - հայտարարել է Տոնոյանը:
Նա նշել է, որ պատրաստ է կրել իր բաժին պատասխանատվությունը:
«Բայց միայն իմ արածի և ոչ թե չարածի համար», - նշել է Տոնոյանը:
Քրեական գործի մասին
2021թ.-ի սեպտեմբերի 30-ին հայտնի դարձավ Դավիթ Տոնոյանի և սպառազինության մատակարար ընկերության տնօրեն Դավիթ Գալստյանի («Պատրոն Դավո») կալանքի մասին: Նրանք ձերբակալվել էին ԱԱԾ-ի կողմից մոտ 2,28 մլրդ դրամի առանձնապես խոշոր չափերի հափշտակություն կատարելու մեղադրանքով:
Հոկտեմբերի 2-ին իրավապահ մարմինների կողմից ձերբակալվեց նաև ԶՈՒ ԳՇ պետի տեղակալ Ստեփան Գալստյանը:
Տոնոյանի փաստաբանները հայտարարում են, որ իրականացվում
է ոչ օբյեկտիվ քննություն և քննությունը ոչ պրոֆեսիոնալ կերպով է մեկնաբանում քրեական
գործերը, որոնք հիմնված են բացառապես ենթադրությունների վրա:-0-
