Տավուշում վիրավորված զինծառայողը վիրահատվել է, վիճակը կայուն է. ՊՆ

ԵՐԵՎԱՆ, 1 մայիսի./Նովոստի–Արմենիա/. Պայմանագրային զինծառայող Արգիշտի Սամվելի Սեփխանյանի վիրահատությունն անցել է բարեհաջող։ Այս մասին Facebook–յան իր էջում գրել է ՀՀ ՊՆ մամուլի քարտուղար Արծրում Հովհաննիսյանը։ 

Նախօրեին` ապրիլի 30–ին, ժամը 14:20-ի սահմաններում, ՀՀ ՊՆ N զորամասի պահպանության շրջանի մարտական դիրքի ուղղությամբ հակառակորդի կողմից արձակած կրակոցի հետևանքով գլխի շրջանում հրազենային բեկորային վնասվածք է ստացել պայմանագրային զինծառայող Արգիշտի Սամվելի Սեփխանյանը։ Նա տեղափոխվել է Երևան կայուն ծանր վիճակում։

«Պայմանագրային զինծառայող Արգիշտի Սամվելի Սեփխանյանի վիրահատությունն անցել է բարեհաջող։ Նրա վիճակը կայուն է, դրական դինամիկայով», – հայտնել է Հովհաննիսյանը։

Դեպքի առթիվ ՀՀ քննչական կոմիտեի ԶՔԳՎ վեցերորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի 13-րդ կետով (մահափորձ, որը կատարվել է ազգային, ռասայական կամ կրոնական ատելության կամ կրոնական մոլեռանդության շարժառիթով): Կատարվում է նախաքննություն։–0–