ԵՐԵՎԱՆ, 30 մայիսի./Նովոստի–Արմենիա/. ՀՀ ոստիկանությունն արձագանքել է Արցախի պաշտպանության նախկին նախարար, Արցախի հերոս Սամվել Բաբայանի համակիրների ուղղությամբ կրակահերթեր արձակելու մասին տեղեկություններին։
Ինչպես նշված է «Նովոստի–Արմենիա» գործակալություն ստացված հաղորդագրության մեջ, մայիսի 29-ի գիշերը՝ ժամը 03։30-ի սահմաններում, Սևանի մայրուղու Սևան- Մարտունի ճանապարհահատվածին կրակահերթեր են արձակվել Սամվել Բաբայանի համակիրների, զինակից ընկերների ուղղությամբ։
«Արցախցիներին հայտնի բանդայի կողմից հետապնդվել են Սամվել Բաբայանի համակիրները, զինակից ընկերները, որոնք Սամվել Բաբայանի հետ մարտական ուղի են անցել և վերջինիս հետ ծառայել զինվորական կառույցներում, այսօր էլ ակտիվորեն մասնակցում են նրա հանդիպումներին։ Նրանց ճանապարհը փակել են և հրազենից կրակահերթ ուղղել նրանց ուղղությամբ։ Այդ ճանապարահատվածի բոլոր հնարավոր տեսախցիկներն ու արագաչափերը ֆիքսել են «բանդայի» մրցավազքը։», – նշվում է ստացված հաղորդագրության մեջ։
Հայտարարության հեղինակները կոչ են անում Հայաստանի պատկան մարմիններին արձագանքել տվյալ միջադեպին ու ձեռնարկել համապատասխան միջոցառումներ։
ՀՀ ոստիկանության արձագանքը
Ինչպես նշվում է ՀՀ ոստիկանության Facebook–յան էջում, նախքան տարածված հայտարարությունը ոստիկանությունն արդեն իսկ օպերատիվ տվյալներ ուներ և ոստիկանության պետի հանձնարարությամբ ձեռնարկվել և այս պահին էլ ձեռնարկում են անհրաժեշտ օպերատիվ-հետախուզական միջոցառումներ միջադեպի բոլոր մասնակիցների ինքնությունը, նրանց գտնվելու վայրը ճշտելու, ինչպես և կատարվածի բոլոր հանգամանքները պարզելու ուղղությամբ։
«Միջոցառումները շարունակվում են։ Կատարվում է քննություն», – նշվում է գերատեսչության հաղորդագրության մեջ։–0–