QR կոդի սկանավորման կարիք չկա՞. ԱՆ-ն հայտարարություն է տարածել կորոնավիրուսային նոր սահմանափակումների վերաբերյալ

ԵՐԵՎԱՆ, 26 հունվարի./Նովոստի-Արմենիա/. Հանրային վայրերում այցելելիս QR» կոդի կանաչ հատվածը ցուցադրելը բավարար է անձի մուտքը թույլատրելու համար, հայտնում է ՀՀ առողջապահության նախարարությունը:


«Հանրային վայրեր այցելելիս, ըստ կարգի, «Արմեդ» հավելվածից «QR» կոդի կանաչ հատվածը ցուցադրելը բավարար է անձի մուտքը թույլատրելու համար, «QR» կոդը սկանավորելու կարիք չկա, բայց սկանավորելու պարագայում, քաղաքացիների անձնական տվյալների պաշտպանության համար, անձնական էջում ներառված տվյալները փակ կլինեն` բացի անուն, ազգանունից», - նշվում է գերատեսչության հաղորդագրության մեջ:

ԱՆ-ից նաև հայտնում են, որ COVID-19-ով վարակման պարագայում քաղաքացու հիվանդության փաստը «Արմեդ» հավելվածում արտածվում է կարմիր «QR» կոդով, և նրա վարակված լինելու ամբողջ ժամանակահատվածում բոլոր կանաչ «QR» կոդերը կդառնան մոխրագույն, իսկ առողջանալուց հետո դրանք նորից կկանաչեն:

Նշենք, որ հունվարի 22–ից Հայաստանում ներդրվել են կորոնավիրուսային նոր սահմանափակումներ, ըստ որոնց` հյուրանոց, սննդի օբյեկտ, մարզասրահ, գրադարան, թանգարան այցելողները պետք է ներկայացնեն կորոնավիրուսի դեմ պատվաստումը հաստատող QR կոդ կամ թեստավորման սերտիֆիկատ:-0-