ՔԿ–ն հրապարակել է Մհեր Եղիազարյանի մահվան պատճառն ու ներկայացրել նրա նկատմամբ առաջադրված մեղադրանքների մանրամասները

ԵՐԵՎԱՆ, 27 հունվարի./Նովոստի–Արմենիա/. Հաշվի առնելով հանրության հետաքրքրությունը` ՀՀ ՔԿ–ն հանդես է եկել պարզաբանմամբ Մհեր Եղիազարյանի մահվան պատճառների կապակցությամբ և ներկայացրել է քրեական գործերի մանրամասները, որոնց շրջանակում նրան առաջադրվել է մեղադրանք։ 

ՔԿ– տարածած հաղորդագրության մեջ նշվում է, որ Մհեր Եղիազարյանը, 2015 թվականի գարնանը աշխատելով  «Հայջրմուղկոյուղի» ՓԲԸ-ում որպես մամուլի և հասարակայնության հետ կապերի պատասխանատու, ՓԲԸ–ում հայտարարված մրցույթում հաղթող  ճանաչելու վերաբերյալ ՍՊ ընկերություններից մեկի տնօրենին կեղծ խոստում տալով՝  պահանջել և խաբեությամբ մաս-մաս ստացել է  առանձնապես խոշոր չափի գումար, ինչի համար ՀՀ քրեական օրենսգրքի 178-րդ հոդվածի  3-րդ մասի 1-ին կետով դատապարտվել է ազատազրկման՝ 4 տարի ժամկետով , սակայն պատիժը պայմանականորեն չի կիրառվել, և  սահմանվել է փորձաշրջան՝ հինգ տարի ժամկետով:

«2018 թվականի դեկտեմբերին ՀՀ ԱԱԾ քննչական դեպարտամենտում հարուցված քրեական գործի շրջանակներում Մհեր Եղիազարյանին մեղադրանք է առաջադրվել՝ ՀՀ քրեական օրենսգրքի 178-րդ հոդվածի 2-րդ մասի 2-րդ կետով (2դրվագ, խարդախությունը), 178-րդ հոդվածի 3-րդ մասի 1-ին կետով, 38-34-312-րդ հոդվածի 3-րդ մասի 1-ին կետով (2 դրվագ, կաշառք տալու փորձ) և 38-34-312-րդ հոդվածի 2-րդ մասով:  Նրա նկատմամբ որպես խափանման միջոց է ընտրվել կալանավորումը», – նշվում է գերատեսչության հաղորդագրության մեջ։

2018 թվականի դեկտեմբերի 21-ին քրեական գործը դատախազութան միջոցով ուղարկվել է Քննչական կոմիտե՝ նախաքննությունը շարունակելու:

2018 թվականի հունվարի 17-ին Եղիազարյանը դադարեցրել է հացադուլը և պահվելով ՔԿՀ-ում՝ գտնվել է բուժմասի բժիշկների հսկողության տակ:

Հացադուլից շուրջ 10 օր հետո՝ այսօր առավոտյան,   Մհեր  Եղիազարյանի ինքնազգացողությունը կտրուկ վատացել է, և ժամանած շտապ օգնության բժիշկների կողմից արձանագրվել է նրա մահը:

«ՀՀ քննչական կոմիտեի ԵՔՔՎ Էրեբունի և Նուբարաշեն վարչական շրջանների քննչական բաժնում Մհեր Եղիազարյանի մահվան հանգամանքները պարզելու համար նախապատրաստվող նյութերով նշանակված դիակի  դատաբժշկական փորձաքննության շրջանակներում պարզվել է, որ  նրա  մահը վրա է հասել սրտամկանի ինֆարկտից», – նշվում է հաղորդագրության մեջ։–0–