Պապիկյանը մեղավոր չէ. Ալեն Սիմոնյանը կարծում է, որ նախարարը չի կարող կապ ունենալ 15 զինծառայողի կյանք խլած հրդեհի հետ

ԵՐԵՎԱՆ, 23 հունվարի./Նովոստի–Արմենիա/. ԱԺ խոսնակ Ալեն Սիմոնյանը հայտարարել է, որ պաշտպանության նախարար Սուրեն Պապիկյանը կապ չունի 15 զինծառայողի կյանք խլած ողբերգական հրդեհի հետ։

«Պաշտպանության նախարարն այս ամենի հետ որևէ ձևով չի կարող կապ ունենալ, որովհետև իր գործառույթի մասով ինքն իր աշխատանքը ամբողջովին արել է։ Այդ քաղաքական սակարկումները նախարարի վերաբերյալ սին ու անտեղին եմ համարում», – հայտարարեց նա ԱԺ–ում ճեպազրույցի ժամանակ։

Սիմոնյանը նշեց, որ ամենամեծ խնդիրն անվտանգության կանոնների չպահպանումն է։

«Պատուհաններին եղել են ճաղավանդակներ, որոնք չպետք է լինեին։ Մարդիկ, ովքեր պատասխանատու են անվտանգության համար, պատժվել և պատժվելու են։ Ինչ վերաբերում է քաղաքական պատասխանատվությանը, ապա քաղաքական ղեկավարությունն իր կողմից ամեն ինչ արել է և շարունակելու է անել», – ասաց Սիմոնյանը։

ԱԺ խոսնակն ընդգծեց, որ երկրի բանակի համար «ամեն ինչ գնվում է», գումարի հետ կապված խնդիր չկա։

«Հայաստանի Հանրապետությունը բանակի վրա ծախսելու գումարի որևիցե խնդիր չունի, և 2018թ.–ից սկսված որևէ դեպք չի եղել, որ գումարի պատճառով մենք որևիցե գնում չկատարենք», – հայտարարեց նա։–0–