ԵՐԵՎԱՆ, 25 մայիսի./Նովոստի–Արմենիա/. Հայտնի դիրիժոր Կոնստանտին Օրբելյանը հայց է ներկայացրել Մշակույթի նախարարության և վարչապետ Նիկոլ Փաշինյանի դեմ Ալ. Սպենդիարյանի անվան օպերայի և բալետի ազգային ակադեմիական թատրոնի տնօրենի պաշտոնից հեռացվելու կապակցությամբ։ Այս մասին «Նովոստի–Արմենիա» գործակալությանը հայտնեց դիրիժորի փաստաբան Տիգրան Մարտիրոսյանը։
Թատրոնի պաշտոնում Օրբելյանի լիազորությունները դադարեցվեցին 2019թ.–ի մարտի 29–ին մշակույթի նախարարի պաշտոնակատար Նազենի Ղարիբյանի որոշմամբ, ինչը հանգեցրեց թատրոնի աշխատակիցների և շարքային քաղաքացիների դժգոհության։ Միաժամանակ, Օրբելյանը պահպանեց թատրոնի գեղարվեստական ղեկավարի պաշտոնը։
Ապրիլի 1–ին թատրոնի աշխատակիցների հետ հանդիպման ժամանակ Փաշինյանը խոստացավ ուսումնասիրել իրավիճակը մեկ ամսվա ընթացքում։ Ձեռք բերվեց պայմանավորվածություն, որ տնօրենի պաշտոնը ժամանավորապես կզբաղեցնի փոխտնօրեն Կարինե Կիրակոսյանը։
Загружается новость ... "Лево"
«Նախօրեին մենք երկու դատական հայց ենք ներկայացրել, որոնցից մեկն ուղարկվել է Երևանի ընդհանուր իրավասության դատարան Մշակույթի նախարարության և «Օպերայի և բալետի թատրոն» ՊՈԱԿ–ի դեմ։ Երկրորդ հայցն ուղարկվել է Վարչական դատարան, որի պատասխանող կողմը վարչապետն է», – ասաց Մարտիրոսյանը։
Նրա խոսքով, նախարարության դեմ ներկայացված իր հայցում դիրիժորը վիճարկում է պայմանագրի գործողության դադարեցումն ու պաշտոնից հեռացումը։
Վարչական դատարանում Օրբելյանը մտադիր է վիճարկել մշակույթի նախարարի պաշտոնակատարի պաշտոնում Նազենի Ղարիբյանին նշանակելու մասին կառավարության ղեկավարի որոշումն այն կապակցությամբ, որ Ղարիբյանն այլ պետության քաղաքացի է (ԶԼՄ–ների տվյալներով, Ֆրանսիայի և Հայաստանի, խմբգր.)։ Ինչպես նշեց փաստաբանը, օրենսդրության համաձայն, հայցերը դատական վարույթ են ընդունվում 7 օրում։
Ավելի վաղ հաղորդվում էր, որ իշխանափոխությունից հետո Օրբելյանի և Մշակույթի նախարարության նոր ղեկավարության միջև ծագել են լուրջ տարաձայնություններ թատրոնում լուրջ կառուցվածքային բարեփոխումների անհրաժեշտության պատճառով։
Հայտնի դիրիժոր, Ռուսաստանի վաստակավոր արտիստ Կոնստանտին Օրբելյանն Ալ. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար է նշանակվել 2016թ.–ի հունիսի 3–ին թատրոնի վարչության խորհրդի առաջարկով և տնօրեն Ա. Արզումանյանի հրամանով։ 2017թ.–ի օգոստոսի 3–ին մշակույթի նախարարի հրամանով Օրբելյանը նշանակվել է նաև թատրոնի տնօրեն։–0–
