ԵՐԵՎԱՆ, 27 հունիսի./Նովոստի–Արմենիա/. Լարսում արգելված բեռ տեղափոխելու կասկածանքով ձերբակալված ավտոբուսի վարորդն արդեն ազատ է արձակվել։
Այդ մասին նշվում է Վրաստանում ՀՀ դեսպանատան հայտարարության մեջ։
«Հայտնում ենք, որ հունիսի 24-ին ռուս-վրացական Վերին Լարսի անցակետի վրացական հատվածում արգելված բեռ տեղափոխելու կասկածանքով ձերբակալված ավտոբուսի վարորդն արդեն ազատ է արձակվել։ Սույն գործով ձերբակալվել է ավտոբուսի ուղևորներից մեկը, ում արդեն մեղադրանք է առաջադրվել», – նշվում է դիվանագիտական առաքելության Facebook–յան էջում։
Դեսպանատնից նաև հայտնում են, որ մշտական կապ են պահպանում Վրաստանի պատկան մարմինների հետ և վերոնշյալ գործի առնչությամբ հանդես կգան հավելյալ հայտարարություններով։
Մոսկվայից Հայաստան ուղևորվող ավտոբուսը կանգնեցվել է հունիսի 24–ին ռուս–վրացական սահմանում արգելված բեռ տեղափոխելու կասկածանքով։ ԶԼՄ–ների հաղորդմամբ, ավելի ուշ ավտոբուսում հայտնաբերվել է գիրոսկուտեր, որում թաքցված է եղել 500 գրամ թմրանյութ։ Վարորդը ձերբակալվել էր, իսկ ուղևորները շարունակել էին ճանապարհն ուրիշ ավտոբուսով։–0–