ԵՐԵՎԱՆ, 15 հուլիսի./Նովոստի–Արմենիա/. Խաչատրյան քույրերի իրավունքների երաշխավորման հարցով Մարդու իրավունքների պաշտպան Արման Թաթոյանը հեռախոսազրույց է ունեցել Ռուսաստանի Դաշնությունում մարդու իրավունքների հանձնակատար Տատյանա Մոսկալկովայի հետ, հաղորդում են ՀՀ մարդու իրավունքների պաշտպանի աշխատակազմի հանրային կապերի բաժնից:
Загружается новость ... "Лево"
Արման Թաթոյանը Տատյանա Մոսկալկովայի հետ պայմանավորվածություն է ձեռք բերել Խաչատրյան քույրերի հետ կապված փոխանցել համապատասխան տեղեկություններ, հանրության, այդ թվում՝ իրավապաշտպանների մտահոգությունները, որպեսզի գործում առկա մյուս տվյալների հետ ուսումնասիրի և քայլեր ձեռնարկի իր իրավասության շրջանակում։
Հիշեցնենք, որ Մոսկվայում բնակվող Խաչատրյան քույրերը մեղադրվում են հոր՝ Միխայիլ Խաչատուրյանի սպանության գործով։
Իրենց հորը սպանած Խաչատրյան քույրերի գործը վերջին ամիսներին ընտանեկան բռնության մասին Ռուսաստանում ամենաաղմկոտ թեման է։ 2018 թվականի հուլիսին 57–ամյա Միխայիլ Խաչատրյանի դին հայտնաբերվել է Մոսկվայի բազմաբնակարան շենքերից մեկի շքամուտքում` բազմաթիվ կտրած–ծակած վերքերով։
Քննության ընթացքում կատարվել են մի շարք փորձաքննություններ, որոնք ցույց են տվել, որ Խաչատրյանը երկար տարիների ընթացքում պարբերաբար ֆիզիկական, էմոցիոնալ և սեռական բռնության է ենթարկել իր դուստրերին` 17–ամյա Մարիային, 18–ամյա Անգելինային և 19–ամյա Կրեստինային։
Օրեր առաջ հայտնի է դարձել, որ արդյունքում քննությունը քույրերին մեղադրանք է առաջադրել Ռուսաստանի ՔՕ ամենածանր հոդվածներից մեկով` «Նախնական պայմանավորվածությամբ սպանություն մի խումբ անձանց կողմից», որը նախատեսում է 8-20 տարվա ազատազրկում։–0–
