ԵՐԵՎԱՆ, 13 օգոստոսի./Նովոստի–Արմենիա/. Հայաստանի քաղաքացիական ավիացիայի կոմիտեն մեկնաբանել է ԶԼՄ–ների հրապարակումներն այն մասին, որ «Պոբեդա» ռուսական լոուքոսթերին խոչընդոտում են երևանյան չվերթերի գործարկման հարցում։
Տեղական ԶԼՄ–ները տեղեկատվություն են տարածել այն մասին, որ «Պոբեդան» պատրաստվում է հեռանալ հայկական շուկայից, քանի որ Քաղաքացիական ավիացիայի կոմիտեում ստեղծում են արհեստական խոչընդոտներ «Պոբեդայի» համար դեպի Երևան, այլ ոչ թե Գյումրի (ինչպես այժմ է, խմբգր.) թռիչքներ կազմակերպելու հարցում` միաժամանակ Երևան ներգրավելով այլ ավիափոխադրողների։
Ինչպես «Նովոստի–Արմենիա» գործակալությանը հայտնեց Կոմիտեի օդային կարգավորումների վարչության պետի տեղակալ Ստեփան Փայասլյանը, 2019–2020թթ.–ի ձմեռային սեզոնին դեպի Երևան ավիափոխադրումներ իրականացնելու ոչ մի հայտ չի մերժվել։
Загружается новость ... "Лево"
«Ձմեռային շրջանում ավիափոխադրումների հայտերն ընդունվում են մինչև հոկտեմբերի 20–ը», – նշեց նա` ընդգծելով, որ «Պոբեդա» ավիաընկերությունից ձմեռային շրջանում դեպի Երևան թռիչքներ իրականացնելու հնարավորության տրամադրման հայտ չի ստացվել։
Նրա խոսքով, հայկական շուկայից «Պոբեդայի» հնարավոր հեռանալու մասին խոսակցությունները կարող են չափազանցված լինել, քանի որ ընկերության արտոնագիրն ուժի մեջ է մինչև հոկտեմբերի 27–ը։
«Ցանկացած ընկերություն ինքն իրավունք ունի ընտրել այն օդանավակայանը, որի միջոցով պատրաստվում է իրականացնել ավիափոխադրումները` միաժամանակ հաշվի առնելով սեփական ֆինանսական հնարավորությունները։ Կոմիտեն ոչ մի կերպ չի կարող խանգարել նրանց գործունեությանը», – ասաց նա։
Օրերս ԶԼՄ–ները հաղորդեցին, որ «Պոբեդա» լոուքոսթերը մտադիր է ձմեռային սեզոնից դադարեցնել չվերթերը դեպի Գյումրու «Շիրակ» օդանավակայան վառելիքի սիստեմատիկ թերլցման պատճառով։
Լոուքոսթերի հայտարարության կապակցությամբ կազմակերպվեց ներքին ստուգում «Արմենիա–Միջազգային օդանավակայաններ» ՓԲԸ–ում, որը Գյումրիու «Շիրակ» և Երևանի «Զվարթնոց» օդանավակայանների կոնցեսիոն կառավարիչն է։
Դեպի Գյումրու «Շիրակ» օդանավակայան իրականացվող «Պոբեդա» լոուքոսթերի չվերթերն առավել մատչելի միջոց են այն մարդկանց համար, ովքեր ցանկանում են Մոսկվայից այցելել Հայաստան կամ հակառակը։ 2016թ.–ի դեկտեմբերին իրականացվեց առաջին թռիչքը, և այս պահին «Պոբեն» կատարում է շաբաթական 10 չվերթ, իսկ ձմեռային սեզոնին նախատեսված էր շաբաթական 7 չվերթ։-0-