ԵՐԵՎԱՆ, 22 փետրվարի./Նովոստի–Արմենիա/. Հայաստանը մասնակցում է Աբի Դաբիում անցկացվող IDEX-2021 միջազգային ռազմարդյունաբերական ցուցահանդեսին, սակայն ցուցահանդեսի առաջին իսկ օրվանից հայկական ընկերությունների տաղավարն արժանացավ կտրուկ քննադատության սոցցանցերի հայկական տիրույթում։
ՀՀ բարձր տեխնոլոգիաների արդյունաբերության նախարարության կողմից նախօրեին տարածված հաղորդագրության համաձայն, Հայաստանը մասնակցում է միասնական տաղավարով, որում ներկայացված են 14 հայկական ընկերություններ, որոնք ներկայացնում են հայկական պրոդուկտներ և լուծումներ ռազմարդյունաբերության ոլորտում։
Սոցցանցերում հայտնվեցին հայկական տաղավարի լուսանկարներ, որոնք տարաբնույթ մեկնաբանությունների տեղիք տվեցին։ Օգտատերերը տարակուսում են, քանի որ հայկական տաղավարը կիսադատարկ է, այնտեղ ներկայացված են միայն բուկլետներ, այն դեպքում երբ ադրբեջանական տաղավարը լի է տարբեր ռազմական սարքավորումներով և տարատեսակ սպառազինությամբ։ Որոշ օգտատերեր նշեցին, որ հայկական կողմի նման մոտեցումը պարզապես ծաղրանք է` հատկապես հաշվի առնելով Արցախյան վերջին պատերազմն ու ռազմարդյունաբերական համալիրի զարգացման և նոր ձեռքբերումների մասին հայտարարությունները։
Այսօր նախարարությունն արձագանքեց օգտատերերի քննադատություններին` տարածելով հաղորդագրություն, որում նշված է, որ ցուցանմուշների տեղափոխման ընթացքում առաջացած լոգիստիկ խնդիրների հետևանքով՝ հայկական ռազմական տեխնիկայի ցուցանմուշները չեն հասել Աբու Դաբի։
«Տեղի ունեցածի հանգամանքները պարզելու նպատակով՝ նախարարի հրամանով սկսվում է ծառայողական քննություն։ Չնայած առաջացած խնդիրներին՝ հայկական ռազմարդյունաբերական ընկերությունները տեղում արդյունավետ աշխատանք են տանում. կապեր են հաստատում միջազգային գործընկերների հետ, բացահայտում են նոր հնարավորություններ և շուկաներ, ուսումնասիրում են միջազգային փորձը ռազմական տեխնիկայի ոլորտում», – նշվում է նախարարության պարզաբանման մեջ։
Նշենք, որ ԶԼՄ–ների հաղորդմամբ, Աբու Դաբիում հայկական տաղավարը ՀՀ բյուջեի համար արժեցել է 25մլն դրամ (մոտ 48 հազար դրամ)։–0–