«Հայաստան» դաշինքն առաջատարն է 65 տեղամասերում քվեարկության ձայների վերահաշվարկի արդյունքում

ԵՐԵՎԱՆ, 23 հունիսի./Նովոստի–Արմենիա/. Կենտրոնական ընտրական հանձնաժողովը տեղեկացնում է, որ երեկ և այսօր Թիվ 2, 3, 4, 5, 6, 7, 9, 10, 11, 13, 14, 17, 23, 24, 25, 33, 34 և 35 տարածքային ընտրական հանձնաժողովներում իրականացվել են առանձին տեղամասերում քվեարկության արդյունքների վերահաշվարկի աշխատանքներ:

Վերահաշվարկի աշխատանքներին ներկա են գտնվել համապատասխան տեղամասային ընտրական հանձնաժողովների անդամները, ընտրություններին մասնակացող կուսակցությունների վստահված անձինք, զանգվածային լրատվության միջոցների ներկայացուցիչներ և դիտորդներ:

«Վերահաշվարկվել է ընդհանուր թվով 65 տեղամասերի քվերակության արդյունքները, որի արդյունքում 27 տեղամասերում թեկնածուներին տրված կողմ ձայների որևէ փոփոխություն չի արձանագրվել, որից 15-ում ընդհանրապես որևէ տվյալի փոփոխություն չի արձանագրվել», – նշվում է Կենտրոնական ընտրական հանձնաժողովի հաղորդագրության մեջ:

Վերահաշվարկից հետո ՀՀ վարչապետի պաշտոնակատար Նիկոլ Փաշինյանի գլխավորած «Քաղաքացիական պայմանագիր» կուսակցությունը ստացել է 659 լրացուցիչ ձայն, նախկին նախագահ Ռոբերտ Քոչարյանի գլխավորած «Հայաստան» դաշինքը` 744 ձայն, ԱԱԾ նախկին տնօրեն Արթուր Վանեցյանի գլխավորած «Պատիվ ունեմ» դաշինքը` 5 ձայն։

ԿԸՀ–ից նաև տեղեկացնում են, որ վաղը, հունիսի 24-ին, ժամը 10:00-ից թիվ 9 և թիվ 34 տարածքային ընտրական հանձնաժողովներում և թիվ 23 տարածքային ընտրական հանձնաժողովում ժամը 11:00-ից կշարունակվեն վերահաշվարկի աշխատանքները:–0–