ԵՐԵՎԱՆ, 12 ապրիլի. /Նովոստի-Արմենիա/. Քաղաքացիական ավիացիայի կոմիտեն որոշել է երկարաձգել մարտի 13-ին հրապարակված Boeing B-737-MAX 8 և Boeing B-737-MAX 9 տեսակի օդանավերի շահագործումն արգելող NOTAM-ը, քանի որ պատահարների պատճառների հետաքննությունը դեռևս չի ավարտվել, հայտնում է կոմիտեի մամուլի ծառայությունը:
«Հարկ ենք համարում նաև նշել, որ Քաղաքացիական ավիացիայի կոմիտեն ուղիղ կապի մեջ է գտնվում Ամերիկայի Դաշնային ավիացիոն ադմինիստրացիայի (FAA) և Եվրոպական ավիացիոն անվտանգության գործակալության (EASA) ղեկավարների հետ ու շարունակում է հետևել իրադարձությունների զարգացմանը՝ ստանալով ամենավերջին տեղեկությունները», - նշվում է տարածած հաղորդագրությունում:
Загружается новость ... "Лево"
Հիշեցնենք, որ մարտի 14-ին ժամանակավորապես արգելվել է Boeing B-737-MAX 8 և Boeing B-737-MAX 9 տեսակի օդանավերի շահագործումը ՀՀ օդային տարածքում։
Մի շարք երկրների ավիաընկերություններ Եթովպիայում գրանցված ավիավթարից հետո հայտարարել են Boeing 737 MAX 8 տեսակի օդանավերի թռիչքների դադարեցման մասին։
Վերջին կես տարում ավիավթարի է ենթարկվել Boeing 737 MAX 8 տեսակի երկու օդանավ։ Այսպես, 2018թ.–ի հոկտեմբերին Lion Air ավիաընկերության Boeing 737 MAX 8 տեսակի օդանավը կործանվել է Ճավա կղզի մոտակայքում, ինչի հետևանքով զոհվել է 189 մարդ։
Մարտի 10–ին Ethiopian Airlines ավիաընկերության ինքնաթիռը, որում կար 157 մարդ, այդ թվում` անձնակազմի 8 անդամ, կործանվեց Եթովպիայի Դեբրե–Զեյթ քաղաքի մոտակայքում։ Ավիավթարի հետևանքով օդանավում գտնվող բոլոր մարդիկ մահացել են։–0–