ԵՐԵՎԱՆ, 12 հունվարի./Նովոստի–Արմենիա/. ԼՀԿ առաջնորդ Էդմոն Մարուքյանն իր վրդովմունքն է հայտնել նախօրեին Մոսկվայում ձեռք բերված պայմանավորվածությունների կապակցությամբ։
Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը և ՀՀ վարչապետ Նիկոլ Փաշինյանը հունվարի 11–ին չորս ժամ տևած բանակցությունների արդյունքում ստորագրել են համատեղ
հայտարարություն, որն ուղղված է տարածաշրջանի զարգացմանն ու հաղորդակցությունների ապաշրջափակմանը։
«Երեկ՝ Մոսկվայում կայացած եռակողմ հանդիպման արդյունքներով փաստաթղթի հրապարակումից հետո, իշխանական բոլոր հնարավոր լրատվական խողովակներով մեծ հրճվանքով ներկայացվում էր, որ ըստ այդ նոր համաձայնության՝ կբացվի Հայաստանն Իրանի և Ռուսաստանի հետ կապող երկաթուղին», – նշել է Մարուքյանը Facebook–յան իր էջում։
Загружается новость ... "Лево"
Նա ընդգծել է, որ հայ ժողովուրդն այդ հանդիպումից ուներ ընդամենը մեկ առաջնային ակնկալիք` ռազմագերիների վերադարձման սեղմ ժամկետի վերաբերյալ պայմանավորվածություն, ինչը, սակայն տեղի չունեցավ։
«Այսինքն՝ հերթական անգամ քննարկումը ծավալվել է բացառապես թշնամու օրակարգի շուրջ, պայմանավորվածություններ են ստորագրվել միայ՛ն թշնամու կողմից բարձրացված խնդիրների վերաբերյալ, իսկ մեզ համար արդեն ամիսներ չլուծվող ռազմագերիների վերադարձման հարցի քննարկումն ու լուծումը կրկին մնացել է առկախված։ Էդ ինչի՞ վրա եք հրճվում ․․․», – գրել է Մարուքյանը։
Եռակողմ հանդիպումից հետո ՀՀ վարչապետ Նիկոլ Փաշինյանը
հայտարարեց, որ ռազմագերիների հարցը չի հաջողվել լուծել և այդ ուղղությամբ աշխատանքը կշարունակվի։–0–
