ԵՐԵՎԱՆ, 13 փետրվարի./Նովոստի–Արմենիա/. «Սասնա ծռեր» համահայկական կուսակցությունն անթույլատրելի է համարել Սիրիայի ռազմական գործողություններում ՀՀ–ի հնարավոր մասնակցության մասին հայտարարությունները։
«Ռուսաստանի Դաշնության հովանու ներքո Սիրիայի նման վտանգավոր պատերազմական թատերաբեմում Հայաստանի զինված ուժերի մասնակցությամբ ռազմական գործողություններն անընդունելի են», – նշվում է չորեքշաբթի կուսակցության քարտուղարության կողմից տարածված հայտարարության մեջ։
Նախօրեին ՀՀ պաշտպանության նախարար Դավիթ Տոնոյանը հայտարարել է, որ եթե Սիրիայում ռազմական գործողություններին մասնակցելու անհրաժեշտություն լինի, ապա Հայաստանը դա անպայման կանի օրենքի տառին համապատասխան:
«Նախարարի՝ առանց շարժառիթների կատարած այս հայտարարությունը ռազմաքաղաքական և աշխարհաքաղաքական առումներով հատում է Հայաստանի Հանրապետության և հայ ժողովրդի համար անվտանգության բոլոր սահմանները», – կարծում են «Սասնա ծռերը»։
Հայտարարության մեջ նշվում է, որ հումանիտար անվանված ծրագրի շրջանակներում Սիրիա ուղարկված զորախումբը, փաստորեն, «նախարարի պնդմամբ ցանկացած պահի կարող է ներքաշվել ռազմական գործողությունների մեջ՝ վտանգելով հայ ժողովրդի անվտանգությունը և կենսական շահերը ինչպես Հայաստանում, այնպես էլ Հայաստանից դուրս»:
«Կոչ ենք անում ՀՀ և արտերկրյա բոլոր ողջամիտ ուժերին դրսևորել միասնական կեցվածք և կանխել հնարավոր վտանգավոր զարգացումները», – նշել են կուսակցությունից։
Հայ մասնագետների` 83 մասնագետից բաղկացած խումբը մարդասիրական առաքելությամբ փետրվարի 8–ին մեկնել է Սիրիա։ Հայկական առաքելության գործառույթներից է հումանիտար ականազերծումը, բնակչության հակաականային իրազեկումը, Հալեպում բուժօգնության ցուցաբերումը բացառապես մարտական գործողություններից դուրս գտնվող գոտում։ -0-