ԵՐԵՎԱՆ, 1 ապրիլի./Նովոստի-Արմենիա/. Երևանի Չեխովի դպրոցի աշակերտներն ու ծնողներն այսօր բողոքի ակցիա են կազմակերպել: Նրանք, մասնավորապես, բողոքում են նոր տնօրենի նշանակման դեմ:
Աշակերտներն ու ծնողները քայլերթով անցել են Երևանի կենտրոնական փողոցներով՝ դպրոցից մինչև քաղաքապետարան:
News.am-ի հաղորդմամբ, դպրոցի ծնողները, աշակերտներն ու ուսուցիչները վրդովված են, որ տնօրենի պարտականություններն այսօրվանից կատարում է Դիանա Մինասյանի, ով տնօրենի ընտրության առաջին 2 փուլերին մասնակցել է և չի հաղթել, իսկ հաջորդ փուլը կայանալու է ապրիլի 14-ին։
Բանն այն է, որ դեկտեմբերին լրացել է դպրոցի տնօրեն Գայանե Սարուխանյանի պաշտոնավարման 5 տարի ժամկետը: Օրենսդրության համաձայն, հոկտեմբերին տեղի է ունեցել մրցույթ, որի ժամանակ տնօրենի պաշտոնի համար առաջադրվել է 3 թեկնածու՝ Գայանե Սարուխանյանը, դպրոցի ուսմասվար Տաթևիկ Մելքոնյանը և Դիանա Մինասյանը, որը դպրոցում չի աշխատում:
Երեք անգամ մրցույթ է տեղի ունեցել, սակայն այդպես էլ հաղթող չի ճանաչվել: Քաղաքապետարանն իր ձայները տվել է Դիանա Մինասյանին, ուսուցչական անձնակազմը և ծնողական կոմիտեն իրենց ձայները տվել են Գայանե Սարուխանյանին, իսկ Տաթևիկ Մելքոնյանի օգտին քվեարկել է միայն ԿԳՄՍՆ-ի ներկայացուցիչները:
Քանի որ դեկտեմբերին լրացել էր Գայանե Սարուխանյանի պաշտոնավարման ժամկետը, նրա լիազորությունները դադարել են և քաղաքապետարանի որոշմամբ տնօրենի ժամանակավոր պաշտոնակատար է նշանակվել ուսմասված Տաթևիկ Մելքոնյանը:
Դեկտեմբերից մինչ օրս նա պաշտոնավարել է որպես տնօրենի ԺՊ, սակայն այսօր նամակ է ստացել քաղաքապետարանից, որ որևէ բան չստորագրի որպես ԺՊ, որովհետև այլ մարդ է նշանակվում ժամանակավոր պաշտոնակատար:
Սա անակնկալ է եղել ուսուցչական կոլեկտիվի և աշակերտների համար, ինչն էլ առաջացրել է նրանց վրդովմունքը:-0-