ԵՐԵՎԱՆ, 18 ապրիլի./Նովոստի–Արմենիա/. ԲՀԿ առաջնորդ Գագիկ Ծառուկյանը հինգշաբթի մոտ կես ժամ եղել է կառավարության շենքում։ Նրա այցը համընկել է կառավարության նիստի ավարտի հետ։
Շենքից դուրս գալիս լրագրողները հետաքրքրվել են Ծառուկյանից այցի մանրամասների մասին։
«Այդ մասին կիմանաք հաջորդ անգամ», – ասաց Ծառուկյանն ու դուրս եկավ։
ԲՀԿ առաջնորդի այցի հնարավոր պատճառը, ըստ ԶԼՄ–ների, կարող էր լինել Ծառուկյանին պատկանող «Արարատցեմենտ» ընկերության շուրջ ստեղծված իրավիճակը։
Արարատցեմենտի աշխատակիցներն ապրիլի 15–ին ակցիա էին կազմակերպել` բողոքելով ձեռնարկության փակման դեմ։ Մի քանի օր առաջ ընկերության աշխատակիցներին ծանուցումներ են ուղարկվել աշխատանքից ազատման և ձեռնարկության փակման մասին։
Ավելի վաղ Ծառուկյանը հայտարարել է, որ մտադիր չէ կրճատումներ անել ձեռնարկությունում` միաժամանակ նշելով, որ կառավարությունը պետք է վերանայի ներկրվող ցեմենտի վրա նոր տուրքի ներդրման հարցը։
ԱԺ–ի շրջանառության մեջ է գտնվում «Պետական տուրքի մասին» օրենքում փոփոխություններ կատարելու առաջարկը, որի նպատակն է պաշտպանել ցեմենտի տեղական արտադրողներին։ Փոփոխություններով առաջարկվում է սահմանել ներկրման տուրք` մեկ տոննայի դիմաց 22 հազար դրամ` ներկրվող ցեմենտի գինը Հայաստանում իրացվող և տեղական արտադրողների կողմից արտադրվող ցեմենտի գնին համապատասխանեցնելու նպատակով։
Խնդիրն այն է, որ վերջին շրջանում հարևան երկրներում էներգակիրների գների զգալի նվազման և դրանց արտադրանքի պետական սուբսիդավորման արդյունքում Հայաստանում զգալիորեն աճել է ցեմենտի ներկրման ծավալը (վերջին տարում` եռակի)։ Դրա հետևանքով տեղական երկու ընկերությունները, որոնց արտադրական հնարավորությունները միասին կազմում են 2 մլն տոննա, չեն կարողանում իրացնել իրենց արտադրական հզորությունների նույնիսկ մեկ երրորդը։
Չնայած կառավարության առաջարկին, պատգամավորներից շատերը դեմ են նման փոփոխություններին` պատճառաբանելով ցեմենտի արտադրողների համար ջերմոցային պայմաններ ստեղծելով, որոնք վնասում են շինարարության շահերին։ «Իմ քայլի» պատգամավորներն առաջարկում են տեղական արտադրողներին բարձրացնել արտադրողականությունը և արտադրության տեխնոլոգիաները, ինչպես նաև ակտիվացնել մրցակցությունը։ Հակառակ դեպքում, պատգամավորների կարծիքով, ավելի շահավետ կլինի ներկրել իրանական ցեմենտ` չարտադրելով տեղականը։ Պատգամավորները նաև նշում են, որ ոլորտներից մեկին առավելություն տալը կառաջացնի այլ ոլորտների արտադրողների դժգոհությունը։–0–