ԵՐԵՎԱՆ, 14 մայիսի./Նովոստի–Արմենիա/. Ադրբեջանական ԶՈւ–ն այս պահին գտնվում է հայկական տարածքում` սահմանամերձ Սյունիքի մարզում, նախօրեին բանակցությունների ժամանակ հայկական կողմի ներկայացուցիչները պահանջել են դուրս բերել զորքը, հաղորդում է ՏԱՍՍ–ը` հղում անելով ՀՀ ՊՆ–ին։
«Նախօրեին բանակցությունների ընթացքում մեր կողմը կոշտ պահանջել է դուրս բերել զորքը` նշելով, որ չի պատրաստվում զիջել մեր տարածքից ոչ մի մետր։ Հակառակորդի ԶՈւ–ն դեռ գտնվում է Սյունիքի այդ հատվածում, մեր տեղեկություններով` սպասում են ղեկավարության հրահանգին», – նշել են գերատեսչությունից։
Հայկական ԶԼՄ–ներում և սոցցանցերում մայիսի 12–ին հայտնվեցին տեղեկություններ այն մասին, որ Սյունիքի մարզի Սև լճի մոտակայքում ադրբեջանական ԶՈւ–ն առաջ է շարժվել Վերիշեն բնակավայրի ուղղությամբ։ Հաղորդվում էր նաև վիրավորների մասին։ ՊՆ–ն իր հերթին հայտնեց, որ մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։ Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ։ Մայիսի 13–ին կառավարության նիստի ժամանակ ՀՀ վարչապետի պ.կ. Նիկոլ Փաշինյանը հայտարարեց, որ Սև լճի հատվածում Ադրբեջանի ԶՈւ–ն հատել է ՀՀ պետական սահմանը։
Մայիսի 13–ին ՀՀ ՊՆ–ն հաղորդագրություն տարածեց` նշելով, որ այսօր ադրբեջանական զինված ուժերը, կրկին՝ «սահմանների ճշգրտման» հիմնավորմամբ, հերթական սադրանքն է իրականացրել Հայաստանի Հանրապետության ինքնիշխան տարածքի նկատմամբ՝ փորձելով դիրքային առաջխաղացում ապահովել Վարդենիսի և Սիսիանի սահմանային հատվածներում։ Երկու դեպքում էլ ՀՀ զինված ուժերի գործողությունների արդյունքում առաջխաղացումը կասեցվել է, ադրբեջանական կողմին պահանջ է ներկայացվել տարածքն անհապաղ լքելու և իրենց ելման դիրքեր վերադառնալու վերաբերյալ։–0–
