ԵՐԵՎԱՆ, 22 մարտի./Նովոստի–Արմենիա/. ՀՀ ազգային ժողովում «Արցախի Հանրապետությունում ստեղծված հումանիտար իրավիճակը, սպառնալիքները եւ հրատապ անելիքները» հասարակական հետաքրքրություն ներկայացնող թեմայով հրատապ քննարկում կանցկացվի փակ ռեժիմով:
«Արմենպրես»-ի հաղորդմամբ՝ ԱԺ փոխնախագահ Ռուբեն Ռուբինյանը հայտարարեց, որ հրատապ թեմայով քննարկումը կանցկացվի մարտի 22-ի երրորդ հիմնական նիստում:
Քննարկում անցկացնելու նախաձեռնությամբ հանդես էին եկել ընդդիմադիր պատգամավորները:
«Հայաստան» խմբակցությունից Արծվին Մինասյանը հիշեցրեց՝ պատգամավորներն առաջարկել էին, որ ԱԺ ղեկավարությունը ջանքեր գործադրի կառավարության երկու պաշտոնատար անձանց ներգրավելու այդ քննարկմանը: Նա հետաքրքրվեց, թե արդյոք ներգրավվելու են ԱԳ նախարար Արարատ Միրզոյանն ու փոխվարչապետ Մհեր Գրիգորյանը:
Ռուբինյանը դրական պատասխան տվեց՝ ընդգծելով, որ ընդդիմության առաջարկով ջանքերը գործադրվել են, և ԱԳ նախարարն ու փոխվարչապետը ներկա կլինեն նիստին որպես զեկուցող:
Ռուբեն Ռուբինյանը նշեց, որ ԱԺ պատգամավորների ընդհանուր թվի առնվազն 1/5-րդը պաշտոնական գրությամբ առաջարկել է հրատապ թեմայով քննարկումն անցկացնել փակ նիստում, ապա առաջարկեց առաջարկը քվեարկել:
Մինչ քվեարկությունը վարման կարգով հանդես եկավ «Հայաստան» խմբակցության քարտուղար Արծվիկ Մինասյանը: Նա ընդգծեց, որ հրատապ թեման, որպես հանրային հետաքրքրություն ներկայացնող հարց, հանրության լայն շրջանակների է հետաքրքրում, ուստի ճիշտ կլինի քննարկումը բաց իրականացնել: «Եթե կան այնպիսի նուրբ հատվածներ, որոնք պարունակում են որոշակի պետական կամ ծառայողական գաղտնիք, կարելի է այդ մասը փակ անցկացնել, բայց ոչ ամբողջ նիստը»,-ասաց նա:
«Քաղաքացիական պայմանագիր» խմբակցության ղեկավար Հայկ Կոնջորյանն արձագանքեց`հարցը ոչ միայն Հայաստանում, այլ նաև Հայաստանից դուրս է հանրային լայն հետաքրքրություն ներկայացնում: «Այս հարցի քննարկումները կոնտեքստային իմաստով կարող են պարունակել Արցախին ու Հայաստանին վերաբերող անվտանգային բնույթի հարցեր, որոնք բաց և ուղիղ ռեժիմով չենք կարող քննարկել՝ հասկանալի պատճառներով, քանի որ լայն հանրությունները ևս կարող են հետևել»,-ասաց նա՝ ընդգծելով, որ ՔՊ-ն շահագրգռված է այդ հարցի քննարկմամբ:
Հարցը քվեարկությամբ ընդունվեց՝ ստանալով 66 կողմ, 18 դեմ, 1 ձեռնպահ ձայներ: Արմեն Ռուստամյանն առաջարկեց, որ նիստին ներկա լինեն նաև Երևանում գտվող արցախցի պատգամավորները: Ռուբինյանն էլ պատասխանեց, որ աշխատանքային կարգով այդ հարցը կքննարկեն:–0–
