ԵՐԵՎԱՆ, 25 նոյեմբերի./Նովոստի–Արմենիա/. ՀՀ կառավարությունը 90մլն դրամ կհատկացնի (մոտ 190 հազար դոլար) BMW մակնիշի ավտոմեքենա ձեռք բերելու համար, որը կսպասարկի ԱԺ խոսնակ Ալեն Սիմոնյանին։ Համապատասխան որոշումն ընդունվել է այսօր գործադիրի նիստում։
Այս որոշման նախագիծը մշակվել է ԱԺ աշխատակազմի կողմից և հրապարակվել կառավարության կայքում։ Նախագծով առաջարկվում է ՀՀ Ազգային ժողովին 2021 թվականի պետական բյուջեով նախատեսված հատկացումների վերաբաշխման արդյունքում տնտեսված ֆինանսական միջոցները ուղղել BMW 750Li xDrive LCI դասի ավտոմեքենայի ձեռքբերմանը։
Նախագծի մեջ նշվում է, որ ՀՀ ԱԺ աշխատակազմի կողմից իրականացվում է Ազգային ժողովի նախագահին սպասարկող (BMW 750Li 2011թ արտադրության) ծառայողական մեքենայի պետական գույքի կառավարման կոմիտեին հանձնելու գործընթացը, քանի որ նշված մեքենայի ընթացիկ տեխնիկական սպասարկումը դարձել է ծախսատար և նրա շահագործման ու պահպանման համար ֆինանսական միջոցների հատկացումները այլևս արդյունավետ և նպատակահարմար չեն։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում