ԵՐԵՎԱՆ, 5 մայիսի. /Նովոստի–Արմենիա/. 6–րդ գումարման խորհրդարանի պատգամավորներն ուրբաթ հանդիսավոր միջավայրում ստացան իրենց մանդատները։
Միջոցառմանը ներկա էին պատգամավորների մեծ մասը։
ԿԸՀ–ի հրապարակած տվյալների համաձայն, նոր խորհրդարան է անցել 105 պատգամավոր չորս քաղաքական ուժերից` իշխող ՀՀԿ (58 մանդատ), «Ծառուկյան» դաշինք (31), «Ելք» դաշինք (9), ՀՅԴ (7)։
ՀՀԿ փոխնախագահ Արմեն Աշոտյանը «Նովոստի–Արմենիա» գործակալության թղթակցին հայտնեց, որ ուրախ է կրկին վերադառնալ օրենսդիր մարմին։
Նա նաև մեկնաբանեց խորհրդարանի խոսնակի պաշտոնում ընտրվելու մասին շրջանառվող խոսակցությունները։ «Ինձ մասին մամուլը գրում է արդեն 15 տարի, և միշտ չէ, որ այդ ամենը ճիշտ է լինում։ Կտեսնենք», – ասաց Աշոտյանը։
ՀՀԿ մամուլի քարտուղար, նախորդ գումարման խորհրդարանի փոխխոսնակ Էդուարդ Շարմազանովն իր հերթին հերքեց խոսակցություններն այն մասին, որ նա է ընտրվելու նոր ԱԺ–ի խոսնակի պաշտոնում։
«Ծառուկյան» դաշինքի մամուլի քարտուղար Իվետա Տոնոյանը «Նովոստի–Արմենիա» գործակալության թղթակցին մեկնաբանեց դաշինքի կազմում առկա պառակտման մասին հրապարակումները։
«Այդ մարդիկ իրենք են ստորագրել մանդատներից հրաժարվելու դիմումները։ Սակայն դաշինքի հետագա աշխատանքի հարցը չի քննարկվել», – ասաց նա։
Ավելի վաղ «Ծառուկյան» դաշինքի` խորհրդարան անցած ներկայացուցիչներից ոմանք ԿԸՀ–ից պահանջել են վերադարձնել պատգամավորական մանդատները` հայտարարելով, որ նրանք չեն հրաժարվել դրանցից։
«Ծառուկյան» դաշինքի ղեկավար Գագիկ Ծառուկյանը ներկա չի եղել մանդատների հանձնման արարողությանը։
«Ծառուկյան» դաշինքից նորընտիր պատգամավոր Լուիզա Սարգսյանը «Նովոստի–Արմենիա» գործակալության թղթակցի հետ զրույցում խոսեց իր հետագա քայլերի մասին` նշելով, որ կփորձի հասնել արտագաղթի նվազման։
«Մեծ ստաժ ունեցող մանկավարժ եմ և խորհրդարանում մտադիր եմ աշխատել կրթության ոլորտում, ինչը կենսական կարևորություն ունի երկրի համար», – ավելացրեց Սարգսյանը։
Նշենք, որ 6–րդ գումարման խորհրդարանի առաջին նիստը տեղի կունենա մայիսի 18–ին։–0–
