ԵՐԵՎԱՆ, 6 դեկտեմբերի. /Նովոստի–Արմենիա/. ՀՀ ԱԺ քառօրյային երեքշաբթի 2017թ. պետական բյուջեի՝ լրամշակված նախագծի քննարկմանը ՀԱԿ խմբակցության անդամ Հրանտ Բագրատյանը հայտարարել է, որ ճիշտ չէ, որ պատգամավորը այդքան դիտողություն ունի անելու, սակայն հնարավորություն չունի ելույթ ունենալ։
«Պարոն Արամյան, դուք առաջ չեք գնում. ինչ սովորել եք 1990-ականներին, այդ մեթոդներով եք առաջ շարժվում: Դուք մեզ ձեռ եք առնում դեֆիցիտի մասին հրապարակումներով: Դուք հաճախ հարմարեցնում եք սուտը։ Ես վախենամ կառավարությանը էս բյուջեով դուք ընդհանրապես թաղեք: Հին բաները նորից բերում, բացատրում եք: Իմ բոլոր հարցադրումներին զավեշտալի պատասխաններ եք տվել», – նշել է Բագրատյանը` դիմելով ՀՀ ֆինանսների նախարար Վարդան Արամյանին։
Նա Վարդան Արամյանին քննադատել է՝ ասելով. «Ժամանակակից տնտեսական քաղաքականությունը չի տեղավորվում այն տնտեսական քաղաքականության մեջ, որ ժամանակին՝ 90-ականների կեսերին դուք սովորել եք: Դուք առաջ չեք գնում»:
Հրանտ Բագրատյանը հիշեցրել է նախարարի տարիքը։
«Դուք մեզանից 10-15 տարի փոքր եք, մենք ձեզ սովորեցնում էինք, ասում ենք՝ աշխարհը փոխվել է», – նշել է Բագրատյանն ու ավելացրել, որ նախարարը ստում է։
Վարդան Արամյանն իր հերթին նշել է, որ փորձում է պահպանել գործընկերության սուլիդարությունը։
«Չեմ կիսում ձեր այն կարծիքը, որ մենք սուտ ենք խոսում։ Ես պատրաստ եմ ցանկացած` իմ կողմից ներկայացված թեզ հիմնավորել ոչ թե 1990-ականներին ստացած գիտելիքներով, այլ ժամանակակից աշխարհում Նոբելյան մրցանակակիրների հիմնավորումներով, ու դա կարող ենք հրապարակային անել», – Բագրատյանի քննադատություններին պատասխանել է Արամյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
