ԵՐԵՎԱՆ, 16 հունվարի./Նովոստի–Արմենիա/. Քիչ առաջ ԱԺ–ում վիճաբանություն տեղի ունեցավ «Բարգավաճ Հայաստան» և «Լուսավոր Հայաստան» խմբակցությունների պատգամավորների միջև։
ԲՀԿ խմբակցության քարտուղար Արման Աբովյանն իր ելույթում անդրադարձավ այսօր ավելի վաղ «Լուսավոր Հայաստան» խմբակցությունից Արման Բաբաջանյանի ելույթին։
Բաբաջանյանը մասնավորապես քննադատել էր ՀՀ արտաքին քաղաքականությունը՝ նշելով, որ տարիների ընթացքում «Հայաստանի կողմից դեսպաններ են նշանակվել կասկածելի կենսագրությամբ և քրեական անցյալով անձինք», ու ասել, որ նման վառ օրինակ է Ուկրաինայում ՀՀ նախկին դեսպան Անդրանիկ Մանուկյանը։
«Պարոն Բաբաջանյան, դուք երևի տեղյակ եք, որ ես 3 տարի եղել եմ Ուկրաինայում ՀՀ դեսպան Անդրանիկ Մանուկյանի խորհրդական։ Այդ թեզերը, որոնք դուք հնչեցրել եք ձեր ելույթում, հայկական ինֆորմացիոն դաշտ հիմնականում ներմուծվել են Ադրբեջանի կողմից։ Ի՞նչն է ձեզ ստիպում այս ամբիոնից նեոադրբեջանական թեզեր առաջ բրդելը», - ասաց Արման Աբովյանը` դիմելով Արման Բաբաջանյանին՝ ։
ԼՀԿ խմբակցության պատգամավորները փորձեցին տեղից պատասխանել Արման Աբովյանին, ինչին միջամտեցին նաև ԲՀԿ պատգամավորները, ինչի հետևանքով դահլիճում վիճաբանություն տեղի ունեցավ ԼՀԿ խմբակցության ղեկավար Էդմոն Մարուքյանի և ԲՀԿ խմբակցության պատգամավոր Հրանտ Մադաթյանի միջև։
Վիճաբանությանը միջամտեց ԱԺ նախագահ Արարատ Միրզոյանը։
«Խնդրում եմ հարգանք պահպանել պատգամավորի ինստիտուտի, միմյանց ու ԱԺ նախագահի նկատմամբ։ Հետայսու խնդրում եմ, որ եթե նման ելույթներ ու հարաբերություններ պարզելու կարիք կա, դա արեք դահլիճից դուրս», - Արարատ Միրզոյանը։–0–
Տեսանյութը` «Ազատություն» ռ/կ