ԵՐԵՎԱՆ, 10 նոյեմբերի. /Նովոստի–Արմենիա/. Ուսանողները շարունակելու են իրենց բողոքի ակցիան երկուշաբթի ԱԺ–ի շենքի դիմաց, ուրբաթ հայտարարեց «Հանուն գիտության զարգացման» քաղաքացիական նախաձեռնության անդամ Դավիթ Պետրոսյանը։
Ուսանողները մասնավորապես դեմ են տարկետման իրավունքի սահմանափակմանը` պնդելով, որ «Զինվորական ծառայության և զինծառայողի կարգավիճակի մասին» նոր օրինագիծը խոչընդոտելու է կրթության զարգացմանը։
«Մենք երկուշաբթի կրկին կհավաքվենք Ազգային ժողովի շենքի առաջ և հույս ունենք, որ այդ ժամանակ մեզ կհաջողվի մասնակցել ՀՀ ԱԺ պաշտպանության և անվտանգության մշտական հանձնաժողովի նիստին և մեր պահանջները ներկայացնել խորհրդարանականներին», – ասաց Պետրոսյանը։
Загружается новость ... "Лево"
Ուրբաթ «Զինվորական ծառայության և զինծառայողի կարգավիճակի մասին» օրենքի նախագծի քննարկումը հետաձգվեց քվորում չապահովելու պատճառով։ Այն տեղափոխվեց երկուշաբթի։
Նախօրեին բողոքող ուսանողները հանդիպել են ՀՀ վարչապետ Կարեն Կարապետյանի հետ, սակայն քննարկման արդյունքում նրանց չի հաջողվել համաձայնության գալ։
«Հանուն գիտության զարգացման» նախաձեռնության անդամ Դավիթ Պետրոսյանը նշեց, որ վարչապետն իրենց առաջարկել է ներկայացնել օրենքի վերաբերյալ իրենց պահանջներն Ազգային ժողովում դրա վերջնական հաստատումից հետո։ Իսկ ուսանողները կարծում են, որ դրանք պետք է դիտարկվեն նախապես և միանգամից ընդգրկվեն վերջնական օրինագծում։
«Միայն այդ ժամանակ այն կարող է ընդունվել»,– նշել է Պետրոսյանը։
Загружается новость ...
"Право"
Նոր օրինագծով առաջարկվում է պարտադիր զինվորական ծառայության զորակոչից ուսումնառության նպատակով տարկետում տրամադրել միայն այն դեպքում, եթե Հայաստանում հավատարմագրված բարձրագույն ուսումնական հաստատություններում բակալավրի, կամ դիպլոմավորված մասնագետի, կամ ինտեգրված կրթական ծրագրով սովորող քաղաքացին պաշտպանության նախարարության հետ կնքում է քաղաքացիաիրավական բնույթի պայմանագիր՝ ուսումնառության ընթացքում ռազմական պատրաստություն անցնելու և ուսումնառության ավարտից հետո պաշտպանության նախարարության կողմից նշված վայրում և պայմաններում զինվորական ծառայություն անցնելու մասին, սակայն այս պարագայում այդ ուսանողները 2-ի փոխարեն կծառայեն 3 տարի ժամկետով։
Հոկտեմբերի 27–ին ՀՀ ԱԺ–ն առաջին ընթերցմամբ ընդունել է օրինագիծը։ –0–