ԵՐԵՎԱՆ, 25 ապրիլի. /Նովոստի Արմենիա/. Սերժ Սարգսյանին Հանրապետական կուսակցության առաջնորդի պաշտոնից հրաժարականի հարցը ներառվել է օրակարգում ու քննարկվում է, այսօր հայտարարել է Հանրապետական խմբակցության ղեկավար Վահրամ Բաղդասարյանը:
«Սերժ Սարգսյանը հրաժարական է տվել վարչապետի պաշտոնից ու դրանից հետո չի ցանկանում մասնակցել ոչ մի քննարկումների: Նա արդեն ամեն ինչ ասել է իր հրաժարականով: Հիմա որոշումներն ընդունում են վարչապետի պաշտոնակատար Կարեն Կարապետյանն ու ՀՀ նախագահ Արմեն Սարգսյանը», - հայտարարեց Բագդասարյանը:
Նա հայտարարել է նաև այն մասին, որ ընդդիմության առաջնորդ Նիկոլ Փաշինյանի պահանջները նոր վարչապետի ընտրությունների մասին անհասկանալի են նրա համար:
Նախօրեին Փաշինյանը հայտարարել է, որ չորեքշաբթի Կարապետյանի հետ նախատեսված բանակցությունները չեն կայանա, և բողոքի շարժումը վերսկսում է քաղաքացիական անհնազանդության տոտալ ակցիաները, քանի որ թավշյա հեղափոխությունը պետք է հասնի իր տրամաբանական ավարտին։ Դրան ի պատասխան` Կարապետյանը հայտարարեց, որ ընդդիմությունն առաջ է քաշել նոր պահանջներ, ինչպես նաև նշեց, որ դիմել է ՀՀ նախագահին` առաջարկելով բոլոր քաղաքական ուժերին քննարկել ստեղծված ներքաղաքական իրավիճակը և հնարավոր հանգուցալուծման ուղիները` ընդհուպ մինչև արտահերթ խորհրդարանական ընտրությունների անցկացում:
«Ժողովրդի թեկնածուն հարաբերական հասկացություն է, Սահմանադրության դրույթները չեն խախտվի: Մենք դիմել ենք ՀՀ նախագահին, որպեսզի նա դիմի Հայաստանի քաղաքական ուժերին երկխոսություն սկսելու համար: Դրանից հետո որպես խորհրդարանական մեծամասնություն մենք որոշում կընդունենք ու կհայտնենք դրա մասին», - հայտարարեց Բաղդասարյանը:
Հայաստանում ապրիլի 13–ից մեկնարկած մասշտաբային բողոքի ակցիաների ֆոնին ապրիլի 23–ին ՀՀ վարչապետ Սերժ Սարգսյանը հրաժարական տվեց։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։–0–
