ԵՐԵՎԱՆ, 29 ապրիլի. /Նովոստի-Արմենիա/. Նախկին պատգամավոր, Դատական ակտերի հարկադիր կատարման ծառայության նախկին ղեկավար Միհրան Պողոսյանն օգտվել է քաղաքական ապաստանի իր իրավունքից: Այդ մասին երկուշաբթի լրագրողների հետ զրույցում ասաց ՀՀ արդարադատության նախարար Արտակ Զեյնալյանը:
«Պողոսյանը ձերբակալվել է, սակայն մինչև Հայաստան արտահանձնվելը հասցրել է օգտվել իր քաղաքացիական իրավունքից և քաղաքական ապաստան է խնդրել: Թե ինչպես լուծել հարցը, Ռուսաստանի ինքնիշխան իրավունքն է», - ասաց Զեյնալյանը:
Ըստ նրա, նման քայլը կարող է դիտարկվել որպես քաղաքական մարտավարություն Հայաստան արտահանձնելու գործընթացի հետաձգման փորձի հարցում։
Նախարարը նշեց, որ դատարանի որոշումը ստանալուց հետո հնարավոր կլինի այն բողոքարկել Վերաքննիչ դատարանում`արտահանձնման ընթացակարգը հետաձգելու համար։
«Ռուսաստանի իրավունքն է պատասխանել հայտին, իսկ որքանով էր դա նրա կողմից հայրենասիրական և բարոյական արդեն սուբյեկտիվ գնահատականներ են: Կարող եմ միայն ասել, որ դա նրա քաղաքացիական իրավունքն է, և յուրաքանչուրը կարող է պաշտպանվել ինչպես ճիշտ է համարում», - ասաց Զեյնալյանը:
ՀՀ հատուկ քննչական ծառայությունում քննվող քրեական գործի շրջանակներում ՀՀ դատական ակտերի նախկին գլխավոր հարկադիր կատարող Միհրան Պողոսյանը ՀՀ քրեական օրենսգրքի 179-րդ հոդվածի 3-րդ մասի 1-ին կետով (Յուրացնելը կամ վատնելը առանձնապես խոշոր չափերով) և 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ) ներգրավվել է որպես մեղադրյալ հանրորեն վտանգավոր այն արարքների կատարման համար, որ նա, օգտագործելով պաշտոնեական դիրքը, վատնման եղանակով առանձնապես խոշոր չափերով գույք է հափշտակել և չարաշահել իր պաշտոնեական լիազորությունները, ինչն առաջացրել է ծանր հետևանքներ։ Ապրիլի 13–ին քննիչները Պողոսյանին կալանավորելու միջնորդություն են ներկայացրել Երևանի ընդհանուր իրավասության դատարան։ Պողոսյանի նկատմամբ հայտարարվել էր հետախուզում։ Ապրիլի 22-ին նա հայտնաբերվել է Ռուսաստանում, իսկ ապրիլի 23-ին 40 օրով կալանավորվել է:-0-