Փաշինյան. եթե «Սպայկան» ուզում է բոյկոտ անի, ուրեմն ուրիշ ընկերություններ ի հայտ կգան

Հայաստանի պետեկամուտների կոմիտեն մեղադրում է «Սպայկա» ընկերության տնօրեն Դավիթ Ղազարյանին հատկապես խոշոր չափերի հարկերից և մաքսատուրքերից խուսափելու համար։ ՊԵԿ–ի տվյալներով, ընկերությունում բացահայտվել է 7 036 666 312 դրամի (ավելի քան $14,4 մլն) չափի հարկերի չվճարման դեպք։ ՊԵԿ–ը միջնորդություն էր ներկայացրել Ղազարյանին կալանավորելու վերաբերյալ, ինչը երկուշաբթի բավարարվել է։

Ինքը` Ղազարյանը, հերքում է այդ մեղադրանքները։ Նա ապրիլի 5–ին կայացած մամուլի ասուլիսի ժամանակ հերքել է խախտումների փաստը` հայտնելով, որ նշված գումարից 5.5 մլրդ դրամն ԱԱՀ վճարումներն են, որոնք պետք է վերադարձվեն ընկերությանը` գործող օրենսդրությանը համապատասխան։

«Եթե «Սպայկան» ուզում է բոյկոտ անի, ուրեմն ուրիշ ընկերություններ ի հայտ կգան, մրցակցային պայմաններում շուկան կկարգավորվի: Ոչ մեկ չի հրաժարվի միլիոնից բոյկոտի համար։ Հեսա կտեսնենք՝ կկանգնեն, թե չեն կանգնի, շատ խելոք էլ կաշխատեն, որովհետև ոչ մեկ էսօր, առավել ևս իրենք, չեն համաձայնի միլիոնավոր դոլարների կորուստ ունենալ, ինչ է թե բոյկոտեն», - հայտարարել է Փաշինյանը լրագրողների հետ զրույցում:

Ըստ վարչապետի, խոշոր բիզնեսի որոշ ներկայացուցիչների հարկերից խուսափումը խոչընդոտում է բյուջետային աշխատողների աշխատավարձի բարձրացմանը:

«7 միլիարդը թույլ կտա 10%-ով բարձրացնել ուսուցիչների աշխատավարձը: Մենք չենք բարձրացնում աշխատավարձերը, քանի որ նման ձեռնարկություններ խուսափում են հարկերից: Կանխատեսումն այն է, որ այդ 7 մլրդ-ը դառնալու է 14, 25, 30 մլրդ (չվճարված հարկերը, խմբգր.): Հնարավոր է՝ բացվի ենթադրաբար մախինացիայի մի շղթա, որը չէր կարող գոյություն ունենալ առանց ամենավերևների հովանավորության», - կարծում է կառավարության ղեկավարը:

Նրա խոսքով, վարչապետ ընտրվելուց հետո իրավապահ ու հարկային մարմիններն անընդհատ ահազանգել են, որ «Սպայկա»-ի հետ կապված կան լրջագույն խնդիրներ, այդ թվում` հարկային:

«Ես բոլորին ասել եմ՝ շատ լավ, ոնց օրենքով նախատեսված կարգն է, հետաքննեք, բայց այնպես արեք, որ աշխատանքային պրոցեսը, արտահանման պրոցեսը չխաթարվի», – նշել է ՀՀ վարչապետը:–0–