Նախարարի աթոռը կթողնի նաև Արփինե Հովհաննիսյա՞նը

ԵՐԵՎԱՆ, 19 նոյեմբերի./Նովոստի–Արմենիա/. Կադրային փոփոխություններ ծրագրվել էին դեռ այս տարվա փետրվար ամսին, որպեսզի անցումը կտրուկ չլիներ, գրում է «Հրապարակը»։

Այդ ժամանակ Արմեն Գևորգյանը պետք է դառնար ոչ թե նախագահի աշխատակազմի ղեկավար, այլ՝ փոխվարչապետ, իսկ փոխվարչապետ Վաչե Գաբրիելյանը` Վերահսկիչ պալատի ղեկավար, ՎՊ նախագահ Իշխան Զաքարյանը` Քաթարում դեսպան: Սակայն Վաչե Գաբրիելյանը կտրուկ դեմ է եղել իր ՎՊ տեղափոխվելուն, գրում է թերթը։

«Նույն աղբյուրների փոխանցմամբ` այս նոր կառավարությունը ևս վերջնական չէ, 6 ամիս հետո Կարեն Կարապետյանը կրկին փոփոխությունների կգնա` ազատվելով հին կադրերից, այդ թվում՝ Էդվարդ Նալբանդյան, Արտեմ Ասատրյան, Հրանուշ Հակոբյան եռյակից՝ խաղի մեջ մտցնելով նոր դեմքեր», – նշում են հոդվածի հեղինակները։

«Նախարարական աթոռը կթողնի նաև Արփինե Հովհաննիսյանը՝ դառնալով պատգամավոր` ԱԺ պետաիրավական հարցերի մշտական հանձնաժողովի նախագահի ակնկալիքներով, իսկ նրա հոգևոր «հայր» Դավիթ Հարությունյանի սպասումներն առնչվում են ԱԺ փոխնախագահի «պորտֆելին»»,–գրում է թերթը։–0–