ԵՐԵՎԱՆ, 5 հունիսի./Նովոստի–Արմենիա/. ՀՀ աշխատանքի և սոցիալական հարցերի նախարար Մանե Թանդիլյանը խոսել է «Կուտակային կենսաթոշակի մասին» օրենքում փոփոխությունների ներդրումը տեղափոխելու պատճառների մասին։
Թանդիլյանն ավելի վաղ հայտարարել էր, որ կառավարության քննարկմանն է ներկայացվել նախագիծ «Կուտակային կենսաթոշակի մասին» օրենքում փոփոխություններ կատարելու մասին, որտեղ առաջարկվում է մեկ տարով (մինչև 2019 թ.–ի հուլիսի 1–ը) հետաձգել սոցիալական վճարների պարտադիր բաղադրիչի կիրառումը։
Загружается новость ... "Лево"
«Հիմա մենք դա անում ենք, որպեսզի խնդիրներին այնպիսի լուծումներ տանք և մշակենք այնպիսի մոտեցումներ, որոնք ընդունելի կլինեն հասարակության համար։ Ընթանում են քննարկումներ այն բանի շուրջ, թե ինչպես կարելի է լուծել խնդիրները։ Չեմ կարող հիմա ասել, թե ինչ ժամանակային սահմաններ կպահանջվեն այդ ինտենսիվ քննարկումների համար», – ասաց 2017 թ.–ի պետբյուջեի կատարողականի լսումների ժամանակ։
Նախարարը նաև նշեց, որ բողոքների որոշ մասը, որը եղել է համակարգի ներդրման պահին, ստացել է իր լուծումը, սակայն հասարակական դժգոհություն առաջացնող գործոնները շարունակում են մնալ։
Նա նաև ասաց, որ մտադիր են ներդնել այնպիսի համակարգ, որն այլևս չունենա հետաձգման կարիք` նշելով, որ գլխավոր փոփոխություններից մեկը պետք է լինի քաղաքացիներին ընտրության հնարավորություն ընձեռելը։
Կենսաթոշակային պարտադիր կուտակային համակարգը ներդրվել է Հայաստանում 2014 թ.–ի հունվարի 1–ից և գործում է 1974 թ.–ի հունվարի 1–ից հետո ծնված բոլոր քաղաքացիների համար։
«Կուտակային կենսաթոշակների մասին» օրենքի մի շարք դրույթները ՀՀ սահմանադրությանն անհամապատասխան ճանաչելուց հետո պարտադիր բաղադրիչը գործում է միայն բյուջետային աշխատողների համար։ Մնացած քաղաքացիների համար օրենսդրական կարգով նախատեսվում էր ավելի վաղ կատարված կենսաթոշակային վճարների վերադարձ։
ՀՀ ԱԺ–ն այս տարվա մայիսի 12–ին երկրորդ և վերջնական ընթերցմամբ ընդունեց փոփոխություններ «Կուտակային կենսաթոշակների մասին» օրենքում, որոնք նախատեսում են պարտադիր բաղադրիչի ներդրման ժամկետի երկարաձգում մինչև 2018 թ.–ի հուլիսի 1–ը։–0–