ԵՐԵՎԱՆ, 20 սեպտեմբերի. /Նովոստի–Արմենիա/. Հայաստանի հանրային հեռուստաընկերության եթերում սեպտեմբերի 21–ին ժամը 22։25–ին տեղի կունենան դեբատներ` Երևանի քաղաքապետի թեկնածուների մասնակցությամբ։ Այս մասին հաղորդվում է հեռուստաընկերության Facebook–յան էջում։
2018 թ.–ի սեպտեմբերի 23–ին նախատեսված են Երևանի ավագանու ընտրությունները։ Երևանի քաղաքապետի պաշտոնը մնացել է թափուր հուլիսի 9–ին քաղաքապետ Տարոն Մարգարյանի հրաժարականից հետո։ Եթե ընտրությունների արդյունքում մասնակցող կուսակցություններից մեկը ստանա 50%–ից ավել մանդատ, ապա այդ կուսակցության ցուցակի առաջին համարը կհամարվի ընտրված քաղաքապետ։ Ընտրություններին մասնակցում է 12 քաղաքական ուժ` 4 դաշինք և ութ կուսակցություն։
Загружается новость ... "Лево"
«Խաղի կանոններ» հեռուստածրագրի շրջանակում կազմակերպված դեբատներին մասնակցելու համար այս պահին համաձայնություն են տվել Արտակ Ավետյանը (Ռեֆորմիստների կուսակցություն), Րաֆֆի Հովհաննիսյանը («Ժառանգություն» կուսակցություն), Միքայել Մանուկյանը (ՀՅԴ) Արտակ Զեյնալյանը («Լույս» դաշինք) Անահիտ Թարխանյանը («Երևանի հանրություն» դաշինք), Գևորգ Հովսեփյանը («Հայք» («Հայկազունիներ») կուսակցություն), Զարուհի Փոստանջյանը («Երկիր ծիրանի» կուսակցություն), Հայկ Մարությանը («Իմ քայլը» դաշինք) Մհեր Շահգելդյանը («Օրինաց երկիր»), Արարատ Զուրաբյանը («Երևանցիներ» դաշինք):
«Ժողովրդավարական ուղի» կուսակցության ցուցակի առաջին համարը՝ Մանուել Գասպարյանը, չի կարողանա մասնակցել դեբատներին անձնական հարգելի պատճառով:
Նաիրա Զոհրաբյանը («Բարգավաճ Հայաստան» կուսակցություն) դեռ չի հաստատել իր մասնակցությունը
Սեպտեմբերի 22–ին հայտարարված է Լռության օր։ Քվեարկությունը տեղի կունենա սեպտեմբերի 23–ին Երևանի ժամանակով ժամը 08։00–ից մինչև 20։00–ն։–0–
