ԵՐԵՎԱՆ, 9 օգոստոսի. /Նովոստի–Արմենիա/. Իրավապաշտպան Զարուհի Հովհաննիսյանն օրերս այցելել է «Աբովյան» ՔԿՀ-ում գտնվող Ռուզաննային, ով մեղադրվում է ամուսնու՝ Արմավիրի մարզպետի խորհրդական Մանուկ Սիմոնյանի սպանության մեջ:
Իրավապաշտպանը
hraparak.am–ին պատմել է, որ Ռուզաննան ծանր հոգեկան վիճակում է եղել։
Загружается новость ...
"Право"
«Նա դեպքի մասին ինչ-որ բան չի հիշում, ես էլ նրան հարցեր չտվեցի, որովհետև չէի ուզում նրա վիճակը ավելի բարդանար, առանց այն էլ օրը մի քանի անգամ նրան այդ հարցերը տրվում են։ Երրորդ կարգի հաշմանդամ է՝ տարբեր տիպի մարմնական վնասվածքներով: Նրա մազերը փունջ-փունջ պոկած են, 15 տարի նա կեղծամով է ման եկել։ Նրա վրա կապտուկներ կան, որոնք ծեծի հետևանք են»։
Աղբյուրի տեղեկություններով՝ Ռուզաննան տառապում է քաղցկեղով, սակայն Զարուհի Հովհաննիսյանը փոխանցել է, որ նրա բժշկական թղթերում այդ հիվանդության մասին ոչինչ գրված չէ։
Պարբերականին Սարդարապատի բնակիչներից մեկը հայտնել է, որ նրանց տղան՝ 23-ամյա Նորիկ Սիմոնյանը գյուղում է։ Աղբյուրի` իրավապահ համակարգի աղբյուրները ևս չեն բացառել կնոջ հնարավոր ազատ արձակումը՝ նշելով, որ եթե ապացուցվի, որ նա հանցանքը կատարել է աֆեկտի ազդեցությամբ, ապա խափանման միջոցը կփոխվի:
Թերթի տեղեկություններով, գործող armavir.am կայքը պատկանել է հանգուցյալին, սակայն այն գրանցել է որդու անունով, քանի որ ինքը` որպես պաշտոնյա, չէր կարող բիզնեսով զբաղվել։ Մանուկ Սիմոնյանի սպանությունից հետո կայքը չէր գործում, այսօր այն վերսկսել է աշխատանքները:
Հուլիսի 25-ին Արմավիրում Մյասնիկյան-Դալարիկ ճանապարհի մոտ գտնվող «Դալարիկի ձոր» կոչվող տարածքում սպանված էին գտել մարզպետի խորհրդական Մանուկ Սիմոնյանին։ Քննչական կոմիտեն տեղեկացրել էր, որ Սիմոնյանի մարմինը կապկպված է հայտնաբերվել։-0-