ԵՐԵՎԱՆ, 20 սեպտեմբերի. /Նովոստի–Արմենիա/. Քաղաքական կուսակցությունները ժամանակավորապես դադարեցրել են նախընտրական քարոզարշավը Գյումրիում թեկնածուներից մեկի որդու մահվան պատճառով։
Գյումրու պետական մանկավարժական ինստիտուտի նախկին ռեկտոր Վարդևան Գրիգորյանի որդու` 26–ամյա Արշակ Գրիգորյանի մարմինը երեքշաբթի ցերեկը տեղափոխվել էր քաղաքային հիվանդանոց։ Տղամարդը մահացել է գլխի շրջանում ստացված հրազենային վիրավորումից։
Վարդևան Գրիգորյանը Գյումրու քաղաքապետի ընտրություններում գլխավորում է «Բարգավաճ Հայաստան» կուսակցության նախընտրական ցուցակը։
Քննիչները պարզել են, որ երիտասարդը հրազենային վնասվածքը ստացել է իրենց առանձնատան նկուղում արձակված կրակոցի հետևանքով։ Դեպքի վայրի զննությամբ հայտնաբերվել են արյան հետքեր, «Մակարով» տեսակի ատրճանակ՝ լիցքավորված փամփուշտներով, 1 պարկուճ։ Հարուցվել է քրեական գործ ՀՀ քրեական օրենսգրքի 110-րդ հոդվածի 1-ին (ինքնասպանության հասցնելը) և 235-րդ հոդվածի 1-ին մասերով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։
Հայկական ԶԼՄ–ների հաղորդմամբ` նախընտրական քարոզարշավի դադարեցման մասին հայտարարել են «Բալասանյան դաշինքը (գործող քաղաքապետ Սամվել Բալասանյան), «ԳԱԼԱ», «Համախմբում» կուսակցությունները, Հայաստանի Հանրապետական կուսակցությունը, ՀԱԿ–ը և «Քաղաքացիական պայմանագիր» կուսակցությունը։
Գյումրու քաղաքապետի ընտրությունները կանցկացվեն հոկտեմբերի 2–ին համամասնական համակարգով։ Ընտրություններին մասնակցում է 11 կուսակցություն։ Ըստ ՀՀ օրենսգրքի` հաղթած կուսակցության ցուցակի «առաջին համարը» ավտոմատ կերպով դառնում է քաղաքապետ։
Վարդևան Գրիգորյանը գլխավորում է «Բարգավաճ Հայաստան» կուսակցության ցուցակը։ 2014 թ.–ի ամռանը սպանվել էր Գրիգորյանի եղբայրը։ Քննության տվյալներով` նա սպանվել էր խանդի հողի վրա։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում