ԵՐԵՎԱՆ, 16 մայիսի. /Նովոստի-Արմենիա/. Դեռ պարզ չէ, թե կգա, արդյո՞ք, Արցախի նախագահ Բակո Սահակյանը Երևանի Ավան և Նոր Նորք վարչական շրջանների ընդհանուր իրավասության դատարան` երաշխավորելու ՀՀ երկրորդ նախագահ Ռոբերտ Քոչարյանի նկատմամբ խափանման միջոցի փոփոխությունը։ Այդ մասին «Նոոստի-Արմենիա» գործակալության հետ զրույցում ասաց Արցախի նախագահի մամուլի քարտուղար Դավիթ Բաբայանը:
Մայիսի 14-ի նիստի ժամանակ Քոչարյանի փաստաբանները ներկայացրել էին դիմում, որտեղ Արցախի նախագահ Բակո Սահակյանն ու նախկին նախագահ Արկադի Ղուկասյանը երաշխավորում են, որ կալանքից ազատվելու դեպքում Քոչարյանը չի խոչընդոտի քննությանն ու չի կատարի Քրեական օրենսգրքով արգելված գործողություններ։ Նրանք երաշխավորել են, որ նա ներկա կլինի դատական նիստերին դատական ողջ գործընթացի ընթացքում և խնդրում են խափանման միջոց կալանքը փոխարինել անազատության հետ կապ չունեցող խափանման միջոցով:
«Դեռ պարզ չէ, թե կգա նախագահը դատարան թե՞ ոչ: Չի բացառվում, որ նա կմասնակցի դատական նիստին», - ասաց Բաբայանը:
Քոչարյանի փաստաբան Ռուբեն Սահակյանն իր հերթին հայտնել է մի շարք հայկական ԶԼՄ-ներին, որ Սահակյանը և Ղուկասյանը կգան դատարան հինգշաբթի` օրվա երկրորդ կեսին:-0-