Կանխվել է միջազգային ահաբեկչական կազմակերպության հետ առնչության մեջ կասկածվող օտարերկրյա պետության քաղաքացու մուտքը Հայաստան. ԶԼՄ

ԵՐԵՎԱՆ, 28 դեկտեմբերի. /Նովոստի–Արմենիա/. ՀՀ ԱԱԾ–ն, ի պատասխան Aravot.am–ի հարցմանը, հաստատել է տեղեկությունն այն մասին, որ կանխվել է  միջազգային ահաբեկչական կազմակերպության հետ առնչության մեջ կասկածվող օտարերկրացու մուտքը Հայաստան։

«ԱԱԾ ստորաբաժանումների ձեռնարկած օպերատիվ-հետախուզական միջոցառումների արդյունքում իսկապես կանխվել է միջազգային ահաբեկչական կազմակերպության հետ առնչության մեջ կասկածվող օտարերկրյա պետության քաղաքացու մուտքը Հայաստանի Հանրապետություն»,– հայտնել են Aravot–ին ԱԱԾ–ից` նշելով, որ օպերատիվ-հետախուզական միջոցառումները շարունակելու կապակցությամբ դեպքի հետ կապված այլ մանրամասներ չեն հաղորդվում։  

Գերատեսչությունից նաև հայտնել են, որ ՀՀ ազգային անվտանգությանը սպառնացող վտանգների մասին հավաստի տեղեկություններ ստանալու դեպքում կանխարգելիչ նման միջոցառումներ մշտապես իրականացվում են:

ԱԱԾ-ից հայտնել են նաև, որ Հայաստանի տարածք միջազգային ահաբեկչական խմբավորումների անդամների ներթափանցումը նախականխելու նպատակով Ազգային անվտանգության մարմիններն ակտիվ համագործակցում են այլ պետությունների գործընկեր ծառայությունների հետ: –0–