ԵՐԵՎԱՆ, 4 հունվարի./Նովոստի–Արմենիա/. 7–րդ գումարման Ազգային ժողովի առաջին նիստը տեղի կունենա հունվարի 14–ին։ Այս մասին հայտարարեց Կենտրոնական ընտրական հանձնաժողովի նախագահ Տիգրան Մուկուչյանն ուրբաթ ԿԸՀ–ի արտահերթ նիստի ժամանակ։
Նիստի ընթացքում որոշում է ընդունվել պատգամավորներին մանդատների տրամադրման և ինքնաբացարկների ընդունման մասին։
ՀՀ վարչապետի պաշտոնակատար Նիկոլ Փաշինյանն ու «Իմ քայլը» դաշինքի համամասնական ցուցակի ևս 17 թեկնածու ներկայացրել են ինքնաբացարկի դիմումներ։ Պատգամավորական մանդատներից հրաժարվել են նաև փոխվարչապետի պաշտոնակատար Տիգրան Ավինյանը, ԿԳ նախարարի պաշտոնակատար Արայիկ Հարությունյանը, տարածքային կառավարման և զարգացման նախարարի պաշտոնակատար Սուրեն Պապիկյանը, Զարուհի Բաթոյանը, Էդուարդ Աղաջանյանը, Ռոմանոս Պետրոսյանը, Վերահսկիչ պալատի նախագահ Դավիթ Սանասարյանը, տրանսպորտի, կապի և տեղեկատվական տեխնոլոգիաների նախարարի պաշտոնակատար Հակոբ Արշակյանը, առողջապահության նախարարի պաշտոնակատար Արսեն Թորոսյանը, Գարիկ Սարգսյանը, բնապահպանության նախարարի պաշտոնակատար Էրիկ Գրիգորյանը, Գնել Սանոսյանը, Տրդատ Սարգսյանը, Անդրեյ Ղուկասյանը, Դավիթ Գևորգյանը, Նարեկ Բաբայանը, արտակարգ իրավիճակների նախարարի պաշտոնակատար Ֆելիքս Ցոլակյանը։
«Լուսավոր Հայաստան» կուսակցությունից (ԼՀԿ) ինքնաբացարկի դիմումներ են ներկայացրել Քրիստ Մարուքյանն ու Արմեն Բաղդասարյանը։ ԲՀԿ–ից ինքնաբացարկի դիմումներ չեն ստացվել։
Դեկտեմբերի 9–ին կայացած արտահերթ խորհրդարանական ընտրությունների վերջնական արդյունքներով, խորհրդարան են անցել «Իմ քայլը» դաշինքը (70,42%), «Լուսավոր Հայաստան» կուսակցությունը (6,37%) և «Բարգավաճ Հայաստան» կուսակցությունը (8,26%)։ 7–րդ գումարման խորհրդարանում ընդհանուր առմամբ լինելու է 132 պատգամավոր, 88 մանդատ ունի «Իմ քայլը» դաշինքը, 26 մանդատ` ԲՀԿ–ն և 18 մանդատ` ԼՀԿ–ն։–0–