ԵՐԵՎԱՆ, 16 դեկտեմբերի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը։
Հայաստանի նախագահ Սերժ Սարգսյանն «Արմենիա» հեռուստաընկերությանը տված հարցազրույցում անդրադարձել է երկրի համար կարևոր մի շարք հարցերի։ Նախագահը, մասնավորապես, նշել է ԵՄ-ի հետ վիզային ռեժիմի ազատականացման գործընթացի ժամկետները, խոսել ղարաբաղյան հիմնախնդրի բանակցությունների 2 հիմնական ուղղությունների մասին։ Երկրի ղեկավարը նաև նշել է տարկետման իրավունքի մասին օրենքի փոփոխությունների դրական կողմերը։ Հարցազրույցում Սերժ Սարգսյանը ներկայացրել է նաև սեփական ծրագրերն ու ապագա կառավարության տեսլականը։
ՀՀ կառավարությունը հավանություն տվեց Ամանորյա արձակուրդների կրճատման օրինագծին։
ՀՀ ազգային անվտանգության ծառայությունը հաղորդագրություն տարածեց` նշելով, որ ԱՄՆ քաղաքացին փորձել է ահաբեկչություն կազմակերպել Հայաստանում, նրա նկատմամբ հետախուզում է հայտարարվել։
ՀՀ ԱԳՆ–ի ղեկավար Էդվարդ Նալբանդյանը հայտարարել է, որ Հայաստանը 2018 թվականի գարունը կդիմավորի առանց հայ-թուրքական արձանագրությունների։ ՀՀ ԱԳ նախարարի այս հայտարարության հենց հաջորդ օրը Թուրքիայի արտաքին գերատեսչությունը ևս հանդես եկավ հայտարարությամբ` նշելով, որ Թուրքիան պահպանում է Հայաստանի հետ հարաբերությունների բարելավմանն ուղղված արձանագրությունների նկատմամբ իր հավատարմությունը և պատրաստ է դրանք վավերացնել բարենպաստ քաղաքական մթնոլորտի դեպքում` չնայած հայկական կողմի` դրանց նկատմամբ բացասական վերաբերմունքին։
Հայտնի դարձավ, որ «Մանչեսթեր Յունայթեդի» գլխավոր մարզիչ Ժոզե Մոուրինյուն ցանկանում է հայ կիսապաշտպան Հենրիխ Մխիթարյանին փոխարինել իտալական «Ինտեր»–ի կիսապաշտպանի հետ։ Մոուրինյուն մասնավորապես հայտարարել է, որ Հենրիխ Մխիթարյանն ամենից քիչն է վաստակել թիմում խաղալու իրավունք։ ՀՖՖ նախագահ Ռուբեն Հայրապետյանն իր հերթին նշել է, որ Հենրիխ Մխիթարյանի խնդիրները շուտով կլուծվեն։ Նրա խոսքով, Հենրիխը մեծ պրոֆեսիոնալ է, աշխատասեր ֆուտբոլիստ։–0–
