ԵՐԵՎԱՆ, 6 դեկտեմբերի. /Նովոստի–Արմենիա/. Gallup International Association հայկական ներկայացուցչության կողմից անցկացված հետազոտության արդյունքում պարզվել է, որ վարչապետի պաշտոնակատար Նիկոլ Փաշինյանի գլխավորած «Իմ քայլը» դաշինքը նախընտրական պայքարի անվերապահ առաջնորդն է։
Ինչպես հինգշաբթի լրագրողներին հայտարարեց Gallup International Association–ի հայկական ներկայացուցչության տնօրեն Արամ Նավասարդյանը, «Իմ քայլը» դաշինքի օգտին պատրաստվում է քվեարկել սոցհարցման մասնակիցների ավելի քան երկու երրորդը։
«Այն հարցին, թե ում եք մտադիր ձեր ձայնը տալ առաջիկա ընտրությունների ժամանակ, հարցվածների 69,4%–ը նշել է, որ կքվեարկի «Իմ քայլը» դաշինքի օգտին, 5,7%–ը` ԲՀԿ–ի, 3,8%–ը` «Լուսավոր Հայաստան» կուսակցության օգտին, 1,4%–ը` «Սասնա ծռերին», 1,3% –ը` ՀՀԿ–ին, 1,2%-ը` ՀՅԴ–ին», – նշեց Նավասարդյանը։
Նրա խոսքով, մնացած կուսակցությունները հավաքել են հարցվածների ձայների 1%–ից պակաս։
Միաժամանակ, հարցվածների 8,7%–ը հրաժարվել է պատասխանել հարցերին, իսկ 7%–ը դժվարացել են պատասխանել։
Նրա խոսքով, նախընտրական քարոզարշավին հետևել է հարցվածների 66%–ը, 76,9%–ը քարոզարշավին հետևել է հեռուստատեսությամբ, 22,3%–ը` նախընտրական հանդիպումների կամ հանրահավաքների միջոցով, 18,5%–ը` Facebook–յան ուղիղ եթերներով, 8,8%-ը` էլեկտրոնային ԶԼՄ–ների և 7,1%–ը` արտաքին գովազդային վահանակների միջոցով։ Քաղաքական ուժերի ծրագրերին ծանոթացել է հարցմանը մասնակցածների մոտ 48%–ը։
Նավասարդյանը նաև նշեց, որ հարցվածների 75,7%–ը հայտարարել է, որ անպայման կմասնակցի խորհրդարանական ընտրություններին, հարցվածների 14,6%–ը «հավանաբար կմասնակցի», 2,7%–ը նշել է, որ ամենայն հավանականությամբ չի մասնակցի ընտրություններին, իսկ 5,7%–ը մտադիր չէ մասնակցել առաջիկա ընտրություններին։
Նավասարդյանը հնարավոր համարեց չնչին փոփոխությունների հավանականությունն ընտրողների վարկանիշերում` հաշվի առնելով նախօրեին կայացած հեռուստաբանավեճը, որին մասնակցեցին բոլոր 11 քաղաքական ուժերի առաջնորդները։
«Բոլոր քաղաքական ուժերի ընտրազանգվածն արդեն ձևավորված է, և տեղաշարժերը կլինեն չնչին։ Միանշանակ, խորհրդարան կանցնեն «Իմ քայլը» դաշինքը, ԲՀԿ–ն, բոլոր շանսերն ունի «Լուսավոր Հայաստանը»», – ասաց նա։
«Նախընտրական ճեպընթաց. վերջին կանգառ» հետազոտությունն անցկացվել է 2018 թ.–ի դեկտեմբերի 1–4–ը, հետազոտությանը մասնակցել է Երևանի և մարզերի 1100 բնակիչ։–0–
