ԵՐԵՎԱՆ, 14 մայիսի. /Նովոստի-Արմենիա/. Հայաստանի քաղաքացիների ավելի քան 84% դրական են գնահատում Նիկոլ Փաշինյանի գործունեությունը վարչապետի պաշտոնում առաջին տարվա ընթացքում: Այդ մասին վկայում են Gallup International միջազգային ասոցիացիայի հետազոտության արդյունքները:
«Նիկոլ Փաշինյանի գործելաոճը վարչապետի պաշտոնում լիովին դրական են գնահատել հարցվածների 29.9%-ը, ավելի շուտ դրական` 54,3%: Այսինքն, արդյունքում, դրական գնահատական են տվել հարցվածների 84,2%-ը», - երեքշաբթի լրագրողների հետ զրույցում ասաց Հայաստանում Gallup International ներկայացուցչության ղեկավար Արամ Նավասարդյանը:
Միաժամանակ փորձագետը նշեց, որ հասարակության վերաբերմունքը Փաշինյանի գործունեության վերաբերյալ` անցած տարվա համեմատ ավելի «սառն է» դարձել:
«Ընդհանուր առմամբ, վարչապետի գործունեությունը դրական գնահատող մարդկանց թիվը նվազել է 10%-ով: Դա պայմանավորված է էյֆորիայի ընդհանուր ֆոնի նվազման հետ, ինչը կապված է 2018 թ.-ի գարնան իրադարձությունների և ավելի ռացիոնալ վերաբերմունքի իրականության հետ», - ասաց նա:
Սպասումները
Ինչպես նշեց Նավասարդյանը, իշխանափոխությունից և Փաշինյանի վարչապետի պաշտոնում նշանակվելուց հետո հայ հասարակության շրջանում ակնկալիքների դրական ֆոն է ստեղծվել` կապված նրա անձի հետ:
«Պատասխանելով հարցին, թե որքանով են արդարացել Փաշինյանի հետ կապված սպասումները, հարցվածների 70,1%-ը նշել է, որ որոշ չափով արդարացել են, 12,5%` որոշ չափով չեն արդարացել, 7,9%` ամբողջովին չեն արդարացել և միայն 7,5%-ը նշել է, որ լիովին արդարացել են», - ասաց նա:
Հարցվածների մոտ 2%-ը դժվարացել է պատասխանել:
Ըստ նրա, 6 ամիս առաջ լիովին արդարացված իրենց սպասումները համարում էին հարցվածների 17,5%, և նման տարբերությունը վկայում է հանրության շրջանում որոշակի հիասթափության մասին:
Բնակչության վստահությունը
Ըստ Հայաստանում Gallup International ներկայացուցչության ղեկավարի, 6 ամիսների ընթացքում զգալիորեն փոխվել է վերաբերմունքը Փաշինյանի նկատմամբ որպես քաղաքական գործչի:
«Նրան որպես քաղաքական գործիչ լիովին դրական են գնահատում հարցվածների 40,4%-ը, բավականին դրական` 49,2%-ը, բավականին բացասական` 3,5%-ը: Իսկ 2018 թ.-ի սեպտեմբերին Փաշինյանի գործունեությունը որպես լիովին դրական գնահատում էին հարցվածների 61,2%-ը», - ասաց նա:
Նավասարդյանը նշեց, որ նման պատկեր հայտնվել է նաև Փաշինյանի հանդեպ հանրության վստահության մակարդակի ուսումնասիրության արդյունքում:
«Վարչապետին լիովին վստահում է հարցվածների 39,9%-ը, ավելի շուտ վստահում են` 6,5%-ը և լիովին չեն վստահում` 6,2%-ը: Ընդ որում, 2018 թ.-ի սեպտեմբերին նրան լիովին վստահում էին հարցվածների 60,2%-ը», - ասաց նավասարդյանը:
Gallup International հարցումը, որը նվիրված էր Նիկոլ Փաշինյանի վարչապետի պաշտոնում 1 տարվա նշանակմանը, անցկացվել է 2019 թ.-ի ապրիլի 30-ից մայիսի 9-ը: Հարցմանը մասնակցել է 18 տարեկանը լրացած 1108 մարդ ինչպես Երևանում (հարցվածների ընդհանուր թվի 33%-ը), այնպես էլ Հայաստանի այլ քաղաքներում և համայնքներում:-0-
