Եկեղեցուց ուղիղ ընտրատեղամաս. հարսը կատարել է իր քաղաքացիական պարտքը (ՖՈՏՈ)

ԵՐԵՎԱՆ, 9 դեկտեմբերի. /Նովոստի–Արմենիա/. Այսօր Հայաստանում պատմական օր է։ Երկրում անցկացվեցին պատմության մեջ առաջին արտահերթ խորհրդարանական ընտրությունները։

Փաստաբան Գարիկ Գալիկյանը Facebook–յան իր էջում հրապարակել է լուսանկարներ, որտեղ երևում է, թե ինչպես է հարսը հարսանեկան զգեստով եկել է ընտրատեղամաս` իր քաղաքացիական պարտքը կատարելու։

«Մարդ պետքա սենց ՔԱՎՈՐ լինի, որ հարսին եկեղեցուց տանի ուղիղ ընտրատեղամաս ընտրության», – գրել է Գալիկյանը։

Հայաստանում տեղական ժամանակով ուղիղ 20։00–ին փակվեցին բոլոր 2010 ընտրատեղամասերը։ Ավարտվեց Հայաստանի պատմության մեջ առաջին արտահերթ խորհրդարանական ընտրությունների քվեարկությունը։

Դեկտեմբերի 9–ին անցկացվեցին 7–րդ գումարման Ազգային ժողովի ընտրությունները։

ԿԸՀ–ի տվյալներով, ռեգիստրում ներառված ընտրողների թիվն է 2 592 486։ Ժամը 17։00-ի դրությամբ Հայաստանի արտահերթ խորհրդարանական ընտրություններին քվեարկել է 1 025 002  քաղաքացի կամ ընտրողների 39,54%–ը։

Ըստ ԿԸՀ–ի, ընտրություններին մասնակցելու հայտ են ներկայացրել 11 քաղաքական կուսակցություններ և դաշինքներ: Փաստաթղթեր են ներկայացրել «Իմ քայլը» դաշինքը, «Բարգավաճ Հայաստան» կուսակցությունը, «Ազգային առաջընթաց», «Քրիստոնեաժողովրդական վերածնունդ» կուսակցությունները, «Սասնա ծռեր» համահայկական կուսակցությունը, «Օրինաց երկիր» կուսակցությունը, «Մենք» կուսակցական դաշինքը, ՀՅԴ–ն, «Լուսավոր Հայաստան» կուսակցությունը, Հայաստանի հանրապետական կուսակցությունը, «Քաղաքացու որոշում» սոցիալ–դեմոկրատական կուսակցությունը։–0–