ԵՐԵՎԱՆ, 12 սեպտեմբերի. /Նովոստի–Արմենիա/. Հանրային հեռուստաընկերության աշնանային եթերաշրջանում կմեկնարկի նոր սիթքոմ, որը կկրի «Ամուսնացածների լիգա» խորագիրը:
Սիթքոմում նկարահանվել են Լուիզա Ներսիսյանը, Անի Պետրոսյանը, Ջեմմա Ադամյանը, Ռաֆայել Երանոսյանը, Սերժոն, Տիգրան Գյուլումյանը և այլ դերասաններ, հաղորդում է հեռուստաընկերության մամուլի ծառայությունը։
Ֆիլմաշարը եթերում կլինի յուրաքանչյուր երկուշաբթիից հինգշաբթի՝ ժամը 20:30-ին:
Загружается новость ... "Лево"
Սիթքոմը կպատմի երեք ամուսնացած զույգերի առօրյայի և խնդիրների մասին: Հերոսները շատ տարբեր են, սակայն նրանց միավորում է ամուսնական կարգավիճակը:
«Ամուսնացածների լիգա». այդպես է կոչում հերոսներից մեկն այն կյանքը, որտեղ հայտնվում է մարդ հարսանիքից հետո: Այդտեղ գտնվելու համար հարկավոր է համբերություն, զիջելու ունակություն, հումոր և աշխատասիրություն: Այս լիգայում չկան հաղթողներ և պարտվողներ, չկան մեծ դրամական պարգևներ. միակ մրցանակը, որին կարելի է արժանանալ ամուսնու հետ միասին երջանիկ լինելն է:
Ֆիլմաշարի ռեժիսորը Հայկ Կբեյանն է, սցենարիստը՝ Աշոտ Աբրահամյան, պրոդյուսերները՝ Արման Միտոյան և Սերժ Նալբանդյան:
Հանրային հեռուստաընկերության նոր եթերաշրջանը կմեկնարկի սեպտեմբերի 18-ին՝ ազդարարելով շուրջ մեկ տասնյակ նոր հաղորդումների սկիզբը:–0–