ԵՐԵՎԱՆ, 25 հունիսի. /Նովոստի Արմենիա/. Գիշերվանից Երևանի քաղաքապետարանի շենքի մուտքն արգելափակած ակտիվիսները բացել են այն։
Նախօրեին համացանցում հայտնվել է ֆիլմ տաքսի ծառայությունների, անշարժ գույքի և այլ ոլորտներում կոռուպցիոն բուրգի մասին` Երևանի քաղաքապետ Տարոն Մարգարյանի, Ավագանու խորհրդի անդամների մասնակցությամբ։
Ինչպես «Ազատություն» ռադիոկայանին տված հարցազրույցում նշել է ակտիվիստ Միքայել Մարգարյանը, նրանք դադարեցնում են ակցիան, քանի որ ՀՀ վարչապետի կոռուպցիայի դեմ պայքարի խորհրդական Արեն Մկրտչյանը գրել է, որ այս գործով կզբաղվի ԱԱԾ–ն։
Ըստ ակտիվիստի, բոլոր միջոցները, որոնք անօրինական կերպով յուրացվել են քաղաքապետի կողմից նրա պաշտոնավարման ժամանակ, պետք է վերադարձվեն Երևանի բյուջե և ուղղվեն քաղաքի խնդիրների լուծմանը։
Ինչպես նշվում է Մկրտչյանի Facebook–յան էջում, հաղորդման նյութերը ողջ ծավալով փոխանցված են Ազգային անվտանգության ծառայությանը։։
«Ինչպես գիտեք, «Երևան» հիմնադրամի գործով հարուցված է քրեական գործ։ Գործն ընթացքի մեջ է, իսկ փոխանցված նյութերը կկցվեն գործին։ Ես ու հետաքննող ողջ թիմը պատրաստ ենք ներգրավվել քր. գործում և որպես վկա կանչվել հարցաքննության», – գրել է Մկրտչյանը։
Ավելի վաղ ԱԱԾ–ն հայտնել է «Երևան» հիմնադրամում կատարված ստուգումների կապակցությամբ ՀՀ ՔՕ 308 հոդվածի 2–րդ մասի (պաշտոնեական լիազորությունները չարաշահում) ու 178 հոդվածի 2–րդ մասի 1.1 կետի (խարդախություն) հատկանիշներով քրեական գործ հարուցելու մասին։–0–