ԵՐԵՎԱՆ, 21 մայիսի./Նովոստի–Արմենիա/. Երևանում`Վճռաբեկ դատարանի շենքի մոտ, առավոտից մեկնարկել է «Հայաստանն առանց քաղբանտարկյալների» բողոքի ակցիան, որի մասնակիցները պահանջում են ազատել Արցախի պաշտպանության նախկին նախարար Սամվել Բաբայանին։
2017 թ.–ի մարտի 22–ին ՀՀ ԱԱԾ–ն հայտնաբերել էր «Իգլա» տեսակի զենիթահրթիռային համալիր։ Զենքի ապօրինի ներկրման և պահելու փաստով հարուցվել էր քրեական գործ։ Հանցագործությանը մասնակցելու կասկածանքով ձերբակալվել էր երեք քաղաքացի, այդ թվում` Արցախի պաշտպանության նախկին նախարար Սամվել Բաբայանը։ Հաղորդվել է նաև, որ ԱԱԾ–ն տեղեկություններ է ստացել Վրաստանից «Իգլայի» ապօրինի ներկրման մասին։ Երևանի Կենտրոն և Նորք–Մարաշ վարչական շրջանների ընդհանուր իրավասության դատարանը 2017 թ.–ի նոյեմբերի նիստում Սամվել Բաբայանին դատապարտեց 6 տարվա ազատազրկման։
Загружается новость ... "Лево"
Մայիսի 18–ին դատարանի շենքի առաջ արդեն
անցկացվել էր ակցիա` նույն պահանջով։ Ցուցարարների մոտ դուրս է եկել Վճռաբեկ դատարանի Քրեական պալատի նախագահ Սերժիկ Ավետիսյանը, ով հայտարարել է, որ Սամվել Բաբայանի գործով վճիռը կընդունվի սահմանված ժամկետում, այսինքն` Վճռաբեկ դատարան բողոքը ներկայացնելուց 3 ամսվա ընթացքում։ Ցուցարարները հայտարարեցին, որ մտադիր են շարունակել ակցիաները մինչև չհրապարակվեն Բաբայանի գործով դատական նիստի անցկացման հստակ ժամկետները։
Այսօրվա ակցիային մասնակցում է մի քանի տասնյակ քաղաքացի, որոնց թվում է նաև ԱԱԾ պետի նախկին տեղակալ Գուրգեն Եղիազարյանը, ով լրագրողներին հայտարարեց, որ Սամվել Բաբայանը պետք է ազատ արձակվի որքան հնարավոր է շուտ։
«Արցախի հերոսը պետք է ազատ արձակվի որքան հնարավոր է շուտ, քանի որ ազատազրկման վայրում նրա հետագա մնալը ամոթ է բոլորիս համար։ Բոլորին հայտնի է` ինչպես և ինչու է նրա դեմ քրեական գործ հարուցվել, և այսօր` հեղափոխությունից հետո, իրավիճակը պետք է փոխվի», – հայտարարեց Եղիազարյանը։
Նա նաև կոչ արեց քաղաքացիներին միանալ այդ պայքարին։–0–