ԵՐԵՎԱՆ, 13 նոյեմբերի. /Նովոստի–Արմենիա/. «Զինվորական ծառայության և զինծառայողի կարգավիճակի մասին» օրինագծով նախատեսված տարկեման իրավունքի սահմափակման դեմ բողոքող ուսանողները երկուշաբթի վերսկսել են ակցիաները Երևանում։
Նոր օրինագծով առաջարկվում է պարտադիր զինվորական ծառայության զորակոչից ուսումնառության նպատակով տարկետում տրամադրել միայն այն դեպքում, եթե Հայաստանում հավատարմագրված բարձրագույն ուսումնական հաստատություններում բակալավրի, կամ դիպլոմավորված մասնագետի, կամ ինտեգրված կրթական ծրագրով սովորող քաղաքացին պաշտպանության նախարարության հետ կնքում է քաղաքացիաիրավական բնույթի պայմանագիր՝ ուսումնառության ընթացքում ռազմական պատրաստություն անցնելու և ուսումնառության ավարտից հետո պաշտպանության նախարարության կողմից նշված վայրում և պայմաններում զինվորական ծառայություն անցնելու մասին, սակայն այս պարագայում այդ ուսանողները 2-ի փոխարեն կծառայեն 3 տարի ժամկետով։
Загружается новость ... "Лево"
Վաղ առավոտից ուսանողները հավաքվում են ԵՊՀ–ի շենքի դիմաց։ Արդեն հայտարարվել է, որ այսօր կազմակերպվելու է երթ։
Ուրբաթ «Հանուն գիտության զարգացման» նախաձեռնության ներկայացուցիչները պատգամավորներին են փոխանցել պաշտոնական նամակ` օրինագծի լսումներին իրենց թույլ տալու խնդրանքով։ Լսումները պետք է անցկացվեին ուրբաթ ՀՀ ԱԺ պաշտպանության և անվտանգության հարցերի մշտական հանձնաժողովում։
Հանձնաժողովի նիստը տեղի չունեցավ քվորումի չապահովման պատճառով, այն տեղափոխվեց երկուշաբթի` նոյեմբերի 13–ին։ Դրանից հետո ուսանողները հայտարարեցին, որ կրկին կհավաքվեն երկուշաբթի ԱԺ–ի շենքի դիմաց և կփորձեն մասնակցել նիստին։
Սակայն ԱԺ հանձնաժողովի նիստը կայացավծ ուրբաթ` նոյեմբերի 10–ին, ժամը 21։00–ին։ Հանձնաժողովը դրական եզրակացություն տվեց օրինագծին։ Չնայած ուշ ժամին, ուսանողներն, այնուամենայնիվ, կրկին հավաքվել էին ԱԺ–ի շենքի դիմաց, որպեսզի ցույց տան իրենց համախմբվածությունն ու հետաքրքրվածությունը քննարկվող օրինագծի հարցում։ Նրանք նաև հայտարարեցին, որ կշարունակեն բողոքի ակցիաները։–0–
