ԵՐԵՎԱՆ, 2 մայիսի. /Նովոստի–Արմենիա/. 25–ամյա Սահակ Դավթյանը մեղադրվում է պոռնկությամբ զբաղվելուն նպաստելու մեջ` երկու կամ ավել անձանց մասնակցությամբ։
Ինչպես հաղորդում է
Pastinfo–ն, հղում անելով Դատալեքս տեղեկատվական համակարգի, Դավթյանը դատապարտվել է 3 տարի ժամկետով ազատազրկման Մալաթիա-Սեբաստիա վարչական շրջանների ընդհանուր իրավասության դատարանի դատավճռով։
Ըստ մեղադրանքի, Սահակ Դավթյանը 2015թ. սեպտեմբերին վարձակալել է Երևանի Սեբաստիա 22 շենքի նկուղային հարկում գտնվող թիվ 103 տարածքը, այնտեղ կատարել վերակառուցման աշխատանքներ, խոհանոցում կառուցել լոգախցիկ և 2015թ. սեպտեմբերից 2016թ. փետրվարն ընկած ժամանակահատվածում այդ շինությունը գործարկել է որպես «Ջիանի» մերսման սրահ:
Այնուհետև Ս.Դավթյանը որպես մերսող աշխատանքի է ընդունել Ա.Զախարյանին, Մ.Հարությունյանին և Լ.Գրիգորյանին, ովքեր սահմանված գնացուցակի համաձայն կատարել են հաճախորդների սեռական կրքերի բավարարմանն ուղղված սեքսուալ բնույթի գործողություններ, իսկ մատուցված ծառայությունների դիմաց հաճախորդներից ստացած վարձատրությունը կիսել են Ս.Դավթյանի հետ:
Դատաքննությամբ պարզվել է, որ Դավթյանը վարձակալված տարածքում ստեղծել է անհրաժեշտ հարմարություններ սեքսուալ բնույթի գործողություններով զուգորդված մերսման ծառայություններ մատուցելու համար։ Մասնավորապես սենյակներից մեկում կառուցել է լոգախցիկ, մյուս սենյակները կահավորել է մերսման համար անհրաժեշտ ներքնակներով, ձեռք է բերել մերսման համար նախատեսված յուղեր և գործարկել «Ջիանի» մերսման սրահը:
Այդ ամենից հետո 2015 թ. հոկտեմբերից սկսած Դավթյանը որպես մերսող աշխատանքի է ընդունել 3 աղջիկների՝ Մ. Հարությունյանին, Ա. Զախարյանին և Լ. Գրիգորյանին, որոնք սահմանված գնացուցակի համաձայն 10 000-ից մինչև 30 000 ՀՀ դրամ վարձատրության դիմաց հաճախորդներին առաջարկել են «ռելաքս», «սպորտային», «էրո» և «վիպ» տեսակի մերսումներ:
Մերսումները զուգորդվել են հաճախորդների սեռական կարիքների բավարարմանն ուղղված սեքսուալ բնույթի գործողություններով։
Առաջադրված մեղադրանքում, սակայն, Սահակ Դավթյանն իրեն մեղավոր չի ճանաչել և ցուցմունքներ տալով հայտնել է, թե գրանցվել է որպես անհատ ձեռնարկատեր և որոշել է բացել մերսման սրահ:
Մերսուհիներ գտնելու նպատակով համացանցում տեղադրել է հայտարարություն, որին առաջինն արձագանքել է Լիլիթ անունով մի աղջիկ, որը հայտնել է, որ նախկինում աշխատել է մերսման սրահում և կարող է իր ծանոթներից ևս աշխատողներ հրավիրել:
Այնուհետև Լիլիթից և մյուս աշխատակիցներից` մերսուհիներից Դավթյանը տեղեկացել է թե ինչպիսի սակագներ են գործում նմանատիպ մերսման սրահներում և ինչ տեսակի մերսումներ են առաջարկվում հաճախորդներին:
Ինքը նախկինում մերսման սրահ չի ունեցել և ձեռնարկատիրական այդ ոլորտն իրեն անծանոթ է եղել, այդ իսկ պատճառով հիմք է ընդունել մերսուհիների ներկայացված տեղեկությունները։
Սրահում առաջարկվել են չորս տեսակի մերսումներ` «ռելաքս», «սպորտային». «էրո» և «վիպ»: «Ռելաքս» տեսակի մերսումը կատարելու ժամանակ մերսուհու հագին եղել է հագուստ, «սպորտային» տեսակի մերսման ժամանակ` կարճ շորտեր և շապիկ, «Էրո» տեսակի մերսման ժամանակ` միայն «ստրինգ» տեսակի վարտիք, իսկ «վիպ» տեսակի մերսումն իրենից ներկայացրել է մերսման վերը նշված տեսակների ամբողջականություն:
Դատարանը գտել է, որ ամբաստանյալի ցուցմունքներն արժանահավատ չեն։
Այսպիսով, Սահակ Դավթյանը դատապարտվել է 3 տարվա ազատազրկման։–0–