Սուրենյանը զգուշացրել է Արարատյան դաշտավայրում սպասվող ցրտահարությունների մասին

ԵՐԵՎԱՆ, 4 ապրիլի. /Նովոստի Արմենիա/. Հայհիդրոմետկենտրոնը զգուշացնում է, որ մի շարք մարզերում ցրտահարություն է սպասվում:

Ապրիլի 4-ի լույս 5-ի գիշերը, ժամը 04։00-07։00 ընկած ժամանակահատվածում Արարատի և Արմավիրի մարզերում, Տավուշում, Արագածոտնի և Վայոց ձորի նախալեռնային գոտում հողի մակերևույթին կանխատեսվում է -2․․․-3 աստիճան։

«Ելնելով սպասվող ջերմային ֆոնից հատկապես ջերմոցային տնտեսություններին հորդորում ենք փակել ջերմոցները, իսկ սածիլված դաշտերում հնարավորության դեպքում նշված ժամերին կատարել ոռոգում», - նշվում է տարածած հաղորդագրությունում։

Առավել ցածր ջերմաստիճանը սպասվում ապրիլի 5-ի գիշերը Շիրակում ու Գեղարքունիքում, ինչպես նաև Կոտայքի, Արագածոտնի ու Վայոց Ձորի լեռներում. Այնտեղ կցրտի մինչւև -6…-11 աստիճան:

Հայհիդրոմետկենտրոնը տեղեկացնում է, որ օդի ջերմաստիճանը ամսի 6-9-ին աստիճանաբար կբարձրանա 6-7 աստիճանով:

Երևանում ապրիլի 5-ին ցերեկը կտաքանա մինչև 14-16 աստիճան, իսկ ապրիլի 6-ից ջերմաստիճանը կսկսի բարձրանալ ու ապրիլի 9-ին կգրանցվի 22-24 աստիճան տաքություն:

Ընդ որում, մինչև արիլի 9-ը տեղումներ չեն սպասվում:

ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը Արարատյան դաշտավայրում և այլ շրջաններում սպասվող ցրտահարությունների հետ կապված ասել է, որ հողի մակերեւույթից 15-20 սմ օդի շերտն է ընդգրկելու, ոչ վերև:

«Իսկ մեր պտղատու ծառատեսակները, բնականաբար, գտնվում են երկրի մակերևույթից գոնե 1-2 մետր բարձրության վրա, որտեղ բացասական ջերմաստիճան չի կանխատեսվում: Օդում ջերմաստիճանը կմոտենա 0-ի և դա կտևի շատ կարճ՝ ընդամենը 15-20 րոպե, որը կլինի լուսադեմին՝ արևածագի պահին՝ ժամը 06:30-07:00-ն ընկած ժամանակահատվածում», - ասել է նա «Հայկական ժամանակ» օրաթերթում:

Սուրենյանը ասել է, որ հնարավոր չէ, որ դա որևէ կերպ վնասի ծաղկած ծառերին, որովհետեւ նախ շատ կարճ է տևելու, հետո բացասական ջերմաստիճան չէ:-0-