ԵՐԵՎԱՆ, 29 դեկտեմբերի. /Նովոստի–Արմենիա/. Տաք եղանակ է սպասվում Հայաստանի տարածքում ընդհուպ մինչև հունվարի 10–ը, հայտնեց Հայհիդրոմետկենտրոնի օդերևութաբանական կանխատեսումների բաժնի պետ Գագիկ Սուրենյանը։
«Երեկվանից` հարավից Հայաստան ներթափանցող տաք օդային հոսանքները կրկին ակտիվացել են։ Երեկ օդի ջերմաստիճանը կրկին բարձրացել է` Կապանում հասնելով 20 աստիճան տաքության, Իջևանում և Բագրատաշենում` 17-18 աստիճան տաքության»,– ուրբաթ լրագրողներին ասաց Սուրենյանը։
Ըստ նրա, ուրբաթ և շաբաթ օրերին օդի ջերմաստիճանը կշարունակի բարձրանալ` Սյունիքում, Մեղրիում, Ագարակում հասնելով 23 աստիճան տաքության, Տավուշի հարթավայրային մասերում` 20 աստիճան տաքության, իսկ Արարատյան դաշտավայրում և Երևանում` 12-14 աստիճան տաքության։
«Մինչև դեկտեմբերի 31-ը Հայաստանում սպասվում է առանց տեղումների եղանակ, սակայն արդեն հունվարի 1-ին հանրապետության տարածք կներթափանցի ցիկլոն, ինչի արդյունքուն տարվա առաջին երկու օրվա ընթացքում ժամանակ առ ժամանակ սպասվում են տեղումներ` հիմնականում անձրևի տեսքով», - նշեց Սուրենյանը:
Նա նշեց նաև, որ հունվարի 1-ից կբարցրանա գիշերվա ջերմաստիճանը:
«Եթե վերջին օրերին եղանակի պարզության պատճառով Արարատյան դաշտավայրում գիշերները բացասական ջերմաստիճան էր արձանագրվում, ապա արդեն հունվարի 1-ի գիշերը օդի ջեռմաստիճանը կդառնա դրական` հասնելով 4-6 աստիջան տաքության», - ասաց Սուրենյան:
Նա հավելեց, որ այսօրվա տվյալներով` մինչև հունվարի 10-ը ցուրտ օդային հոսանքների ներթափանցում հանրապետության տարածք չի կանխատեսվում:
«Դա նշանակում է, որ մինչև հունվարի 10-ը հանրապետության տարածքում կպահպանվի բարձր անսովոր ջերմային ֆոնը», - նշեց Սուրենյանը:
Նա ասաց, որ հիմա Հայաստանի մարզերի մեծ մասում, այդ թվում լեռնային շրջաններում չկա ձյուն:
«Տարվա այս ժամանակաշրջանի համար սա աննախադեպ երևույթ է», - ընգծեց Սուրենյանը: -0-
