ԵՐԵՎԱՆ, 12 դեկտեմբերի. /Նովոստի–Արմենիա/. Մեդիափորձագետ Սամվել Մարտիրոսյանը չորեքշաբթի ասուլիսի ժամանակ թվարկել է արտահերթ խորհրդարանական ընտրությունների քարոզարշավի ամենավառ ու հիշվող պահերը։
«Ինձ թվում է` ամենից շատը կհիշվի Հանրապետական կուսակցության քարոզարշավը, քանի որ այն ամենից շատն էր ընդգծվում, և դրա հիման վրա ստեղծվեցին մեծ թվով մեմեր։ Դա չի նշանակում, որ այն լավագույնն էր, սակայն թողեց ամենաուժեղ հետքը մարդկանց հիշողության մեջ, քանի որ շատ անսովոր էր` սկսած սև–սպիտակ գորշ պաստառներից մինչև ձիեր», – ասաց նա։
Փորձագետը նաև նշեց, որ եթե մի կողմ դնենք որոշ էկսցետրիկությունը, ապա «Իմ քայլը» դաշինքի քարոզարշավը շատ տարածված էր, քանի որ պահանջարկ ուներ հասարակության շրջանում։
Մարտիրոսյանը նշեց, որ բացառիկ էր «Օրինաց երկիր» կուսակցության քարոզարշավը։
«Բացառիկությունը կայանում էր նրանում, որ քարոզարշավի ձևը չէր համապատասխանում բովանդակությանը։ Որակյալ հոլովակներ էին, սակայն PR–ում կարևոր է, թե կոնկրետ ինչ են գովազդում։ Մարդիկ տարածում էին հոլովակները որպես զվարճալի ինչ–որ բան», – ասաց նա։
Միաժամանակ մեդիափորձագետն ընդգծեց, որ աճել է սոցիալական ցանցերի դերն ու կարևորեց գովազդի թիրախավորումը։
«Մենք շատ բան չենք տեսել, քանի որ գովազդն ուղղված էր կոնկրետ մարզերի վրա։ Այդ պատճառով թիրախավորումը ցանցերում կարող էր ավելի մեծ ազդեցություն ունենալ, այն դեպքում, երբ հեռուստատեսությամբ գովազդը գնում է բլոկներով, և շատ մարդիկ չեն կարողանում նստել և նայել դրանք` ընտրության հարցում կողմնորոշվելու համար», – ասաց նա։
Դեկտեմբերի 9–ին Հայաստանում կայացան արտահերթ խորհրդարանական ընտրություններ։ ԿԸՀ–ի հրապարակած նախնական արդյունքներով, 7–րդ գումարման ԱԺ է անցնում «Իմ քայլը» դաշինքը (70,43%), ԲՀԿ–ն (8,27%) և «Լուսավոր Հայաստան» կուսակցությունը (6,37%)։
Նախկին իշխող Հանրապետական կուսակցությունը (4,7%) և ՀՅԴ–ն (3,89%) չկարողացան հաղթահարել անցողիկ 5%–անոց շեմը։ Ընտրություններին մասնակցած մնացած 6 քաղաքական ուժերը հավաքեցին ընտրողների ձայների առնվազն 2%–ը։–0–
