ԵՐԵՎԱՆ, 7 հունվարի./Նովոստի–Արմենիա/. Հայաստանը շարունակում է քննարկել իրանական գազի ներկրման հնարավորությունը, երկուշաբթի լրագրողներին ասել է ՀՀ վարչապետի պաշտոնակատար Նիկոլ Փաշինյանը։
«Իրանական գազի ներկրման հարցը նախկինում քննարկվել է, քննարկվում է և միշտ կքննարկվի, որովհետև կոնկրետ և ձեռնտու լուծում չի գտնվել», – հայտարարել է նա։
2009թ.–ի մայիսի 15–ից Հայաստանն Իրանից գազ է ստանում Իրան–Հայաստան գազատարով։ «Գազ` էլեկտրաէներգիայի փոխարեն» ծրագրի շրջանակում իրանական գազը հայկական տարածքում վերամշակվում է` դառնալով էլեկտրաէներգիա, որը նախատեսված է Իրան արտահանելու համար` 3կՎտ/ժ–ն 1 խորանարդ մետր գազի հաշվարկով։
Загружается новость ... "Лево"
Խոսելով վերջերս սահմանին Հայաստանի համար ռուսական գազի գնի բարձրացման մասին` Փաշինյանը կրկին ընդգծել է, որ այդ փաստը չի ազդի վերջնական սպառողի համար նախատեսված սակագնի վրա։
Փաշինյանը նաև ավելացրել է, որ պաշտոնական Երևանը կշարունակի բանակցությունները ռուսական կողմի հետ գազի գնի շուրջ` երկարաժամկետ լուծումներ գտնելու համար։
«Մենք շարունակելու ենք բանակցությունները և դիրքորոշում ենք արտահայտելու՝ մեր երկրի շահերը պաշտպանելու համար», – ավելացրել է ՀՀ վարչապետի պաշտոնակատարը։
Դեկտեմբերի վերջին «Գազպրոմի» մամուլի ծառայությունը տեղեկացրեց 2019թ.–ի հունվարի 1–ից Հայաստանի համար ռուսական գազի գնի վերանայման մասին`1000 խորանարդ մետրի դիմաց նախկին 150 դոլարի փոխարեն 165 դոլար։–0–