ԵՐԵՎԱՆ, 20 նոյեմբերի. /Նովոստի–Արմենիա/. ՀՀ վարչապետի պաշտոնակատար Նիկոլ Փաշինյանը երեքշաբթի ասուլիսի ժամանակ նշեց, որ ԱԺ արտահերթ ընտրություններից հետո նախարարությունների թիվը կկրճատվի։
«Կառավարության կառուցվածքն ընդհանուր առմամբ կփոխվի։ Այսօր մենք ունենք 17 նախարար, խորհրդարանական ընտրություններից որոշ ժամանակ անց կունենանք շատ ավելի քիչ նախարար», – տեղեկացրեց Փաշինյանը։
Նա նաև նշեց, որ եթե ելնենք հինգ նախարարությունների կրճատման նախադրյալներից, ապա արդեն կարելի է խոսել հսկայական կադրային փոփոխությունների մասին։
Վարչապետի պաշտոնակատարը նաև նշեց, որ փոփոխությունները կանդրադառնան նաև պահպանված նախարարություններին։
«Չի լինի ավտոմատ կրճատում, տեղի է ունենալ բովանդակալից փոփոխություն, ինչի արդյունքում տեղի կունենան նաև փոփոխություններ նախարարների գործառույթներում, քանի որ կընդլայնվեն նրանց պատասխանատվության շրջանակները», – ասաց նա։–0–