ԵՐԵՎԱՆ, 28 հունիսի./Նովոստի–Արմենիա/. ՀՀ ոստիկանապետ Վալերիյ Օսիպյանը հինգշաբթի կառավարության նիստից առաջ լրագրողների հետ ճեպազրույցի ժամանակ ասաց, որ պահածոները փորձել են տեղափոխել գեներալ Գրիգորյանի կնոջ ցուցումով։
Հունիսի 18–ին ՀՀ ոստիկանությունը վարորդների հետ միասին բերման է ենթարկել «Ուազ» և «ԳԱԶ» մակնիշների ավտոմեքենաներ, որոնց զննությամբ հայտնաբերվել են ընդհանուր 2980 հատ «վաճառքի ենթակա չէ, ԶԻՆՎՈՐԻ բաժին» գրառմամբ մսի պահածոներ։ Վարորդների հայտարարությամբ՝ հունիսի 16-ին Արշակունյաց 22 հասցեում գտնվող ԵԿՄ վարչության շենքից իրենք են պահածոները բեռնել՝ Մանվել Գրիգորյանի կնոջ`Նազիկ Ամիրյանի ցուցումով։
«Մենք տեղեկություններ էինք ստացել, որ հենց Ամիրյանի ցուցումով է իրականացվել ապրանքի տեղափոխման փորձը։ Այդ տեղեկությունները փոխանցվել են Հատուկ քննչական ծառայություն», – ասաց Օսիպյանը։
Загружается новость ... "Лево"
Նախօրեին ՀՔԾ–ն հաղորդագրություն տարածեց` նշելով, որ Նազիկ Ամիրյանը ձերբակալվել է։ Նա կասկածվում է ՀՀ ՔՕ 235-րդ հոդվածի 1-ին, 2-րդ մասերով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) և 179-րդ հոդվածի 3-րդ մասի 1-ին կետով (յուրացնելը կամ վատնելը) նախատեսված հանցավոր գործողություններ կատարելու մեջ։ Ամիրյանն անհայտ աղբյուրից ապօրինի կերպով ձեռք է բերել և Մ. Գրիգորյանի հետ իրենց հաշվառման և փաստացի բնակության հասցեում` Վաղարշապատ քաղաքի Ալավերդյան փողոցի 46 տանն ու հանգստի գոտի ծառայող Արմավիրի մարզի Արշալույս գյուղի Լճափնյա 28-րդ և 30-րդ վարչական շենքերում ու հարակից տարածքներում ապօրինի կերպով պահել մեծ քանակությամբ զենք և ռազմամթերք:
Հունիսի 19–ին Մանվել Գրիգորյանի կալանավորվել է։ Նրան մեղադրանք է առաջադրվել ՀՀ ՔՕ 235 հոդվածի 1-ին և 2-րդ կետերով (ապօրինի կերպով զենք ռազմամթերք ձեռք բերելը կրել կամ փոխադրելը, որը կատարվել է մի խումբ անձանց կողմից նախնական համաձայնությամբ) ինչպես նաև ՀՀ ՔՕ 179 հոդվածի 3-րդ մասի 1-ին կետով (մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակություն) նախատեսված հանցավոր գործողությունները կատարելու համար։–0–